“France Football” žurnaly tarapyndan düýn agşam geçirilen Ballon d’Or baýrak gowşurylyş dabarasynyň ýaňy ýokary depginde dowam edýär. Baýragy Messiniň almaly däldigi baradaky gürrüňler bir bilen hatarda, beýleki super ýyldyz Kristiano Ronaldonyň dabara gatnaşmandygy hakyndaky gepler has uly gowur turuzýar. Has takygy, žurnalyň baş redaktory Paskal Ferreniň Ronaldo hakynda aýdanlary sosial mediada uly galmagal turuzdy. Ronaldo Ferreniň aýdanlaryna öz Instagram hasaby arkaly pert jogap berdi. Eýsem Ferre näme diýipdi, Ronaldo näme jogap berdi?
Ferre: “Kristianonyň ýeke-täk maksady bar. Ol hem Messiden köp Ballon d’Or baýragyny gazanyp, futboly taşlamak. Bilýärin, sebäbi ol maňa aýdypdy” diýdi.
Ronaldo bolsa oňa şu setirler bilen jogap berdi: “Paskal Ferre ýalan sözledi. Özüniň hem-de işleýän neşiriniň mahabatyny etmek üçin meniň adymy ulandy. Şeýle abraýly baýragyň guramaçysy bolup, žurnala hem-de Ballon d’Or-a uly hormat goýýan birine hiç hili hormat-sylag etmän ýalan sözlemegi makullar ýaly däl. Ol bu gün ýalan beýanat berdi”.
Ronaldo: “Paskal Ferre, Lionel Messiden köp Ballon d’Or gazanyp, futboly taşlamak isleýändigim barada ýalan aýtdy. Ol öz adyny meşhur etmek üçin meniň adymdan peýdalandy. Karýeram boýunda meniň iň uly islegim professional futbolçy bolmagy maksat edinýänlere görelde bolmak hem-de adymy dünýä futbolyna altyn harplar bilen ýazdyrmak. Karýeramyň başyndan bäri sportmenlik hem-de feýr-pleýe hemişe ähmiýet berdim. Gazananlary hemişe gutlaýaryn. Häzirki wagtda bar küýüm Mançester Ýunaýtedde möwsümiň galany böleginde. Başga zatlar piňime-de däl” diýip, jogap berdi.
