Özbegistanyň paýtagty Daşkendde 7-nji dekabrda badalga alan agyr atletika boýunça 86-njy Dünýä çempionatynda ildeşimiz Ýulduz Jumabaýewa 49 kilograma çenli agram derejesinde çykyş edip, ol kiçi bürünç medala mynasyp boldy. Has takygy ildeşimiz birbada götermekde 76 kilogramy götermegi başardy. Onuň göteren bu agramy iň gowy 3-nji netije bolup, Ýulduz Jumabaýewa bürünç medala mynasyp boldy. Bu agram derejesinde birbada hem-de itekläp götermekde, şeýle-de umumylykda tailandly Surodçana Khambao ýeňiş gazandy.
17-nji dekabra çenli dowam etjek çempionata 74 döwletden 432 türgen gatnaşýar. Biziň ýurdumyzdan hem agyr atletikaçylaryň 11-si ýaryşar. Ýurdumyzyň adyndan zenanlaryň arasynda 49 kilograma çenli agram derejesinde dünýä çempiony Ýulduz Jumabaýewadan başga-da, şol agramda Bagül Berdiýewa, 59 kilograma çenli agram derejesinde Tokio 2020-de kümüş medal gazanan Polina Gurýewa, 71 kilograma çenli agram derejesinde Gülnabat Kadyrowa, 81 kilograma çenli agram derejesinde Aýsoltan Toýçyýewa, şeýle-de erkekleriň arasynda 61 kilograma çenli agram derejesinde Seýitjan Mirzaýew, 73 kilograma çenli agram derejesinde Maksat Meredow, 81 kilograma çenli agram derejesinde dünýäniň wise-çempiony Rejepbaý Rejepow, Şatlyk Şöhradow, 89 kilograma çenli agram derejesinde Rüstem Annaberdiýew hem-de 109 kilogramdan ýokary agram derejesinde belli türgenimiz Hojamuhammet Toýçyýew dagy wekilçilik ederler.
