Ýene-de sanlyja günlerden futbolda gyşky transfer möwsümine badalga berler. Bir aý töweregi dowam etjek transfer möwsüminde birnäçe futbolçynyň klubuny üýtgetmegine garaşylýar. Ispan metbugatynda şu günki çykan habara görä, has täsin transfer wakasynyň bolmagy hem mümkin.
12 ýyldan soň Mançester Ýunaýtede dolanan portugaliýaly super ýyldyz Kristiano Ronaldonyň Barselona bilen şertnama baglaşmagy ähtimal. Bu barada Ispaniýanyň meşhur gazetlerinden “Mundo Deportivo” habar berýär. Tomusda Ýuwentusdan gaýdan Ronaldonyň Ýunaýtedde isleýşi ýaly başarnyk görkezip bilmeýändigi azda-kände mälim. Tälimçi çalşygy-da ony kanagatlandyrmaýar. Sebäbi Ragnigiň taktikasy Ronaldonyň oýnuna o diýen gabat gelenok.
Şeýlelikde, gazetde çykan habarda, Ronaldonyň häzirki wagtda hüjümçi gözleýän Barselona toparynyň ýyldyzlaryndan Pike bilen özüniň transferi barada gürrüňdeş bolandygy bellenilýär. Habarda bellenilişi ýaly, Ronaldonyň Pikeniň kömegi esasynda Hawi bilen jaňlaşyp, özüniň Barselona transfer bolup biljekdigini aýtdy. Habarda klubuň prezidenti Žoan Laportyň hem bu teklibe garşylygynyň ýokdugy bellenilýär. Hatda 2003-nji ýyldaky ýalňyşyny düzeltmek üçin pursatdygyny aýdan Laport şol ýyl Ronaldonyň ornuna Rikardo Kuarežmany transfer edipdi.
Habarda Pikeniň Ronaldodan soň Lionel Messi bilen hem gürleşendigi aýdylýar. Ol gürrüňdeşlik Messiniň Barselonadaky öýi üçin boldy. Pike Messiden öýüni Ronaldo kärendesine sorap jaň edipdir. Messiniň bolsa muňa garşyda däldigi bellenilýär.
Mahlasy, ähli şertler ýerbe-ýer bolan ýagdaýynda Messiden soň agyr günleri başdan geçirýän Barselona üçin Ronaldo çäre bolup biler. Mançester Ýunaýted bilen 2023-nji ýylyň tomsuna çenli şertnamasy bar bolan 36 ýaşyndaky Ronaldo 19 oýunda 13 gol geçirip, 2 gola-da gönümel goşant goşdy.
Aslynda bu gürrüňler belki köpler üçin erteki ýaly. Ýöne häzirki zaman futbolynda bolmajak zat ýok. Häzirlik kagyz ýüzündäki habar bolan bu transfer gürrüňiniň hakykata öwrülip-öwrülmejekdigini wagt görkezer.
