Dünýä futbolynyň hojaýyny FIFA ýylyň iň gowularyny – “The Best” baýraklarynyň ýeňijilerini mälim etdi. Şweýsariýadaky ştab-kwartirasynda geçirilen dabarada FIFA ýylyň futbolçysy diýip, Bawariýanyň polşaly hüjümçisi Robert Lewandowskini saýlady. Yzly-yzyna ikinji gezek bu hormata laýyk görlen Lewandowski Mohamed Salah hem-de Lionel Messiden öňe saýlandy.
Ýylyň zenan futbolçysy baýragyna Barselona toparynyň ýyldyzy Aleksia Putellas laýyk görüldi. Ol bu baýragy gazanan ilkinji ispaniýaly futbolçy boldy.
Ýylyň tälimçileri – Çelsiden
Çelsini UEFA Çempionlar Ligasynda çempionlyga ýetiren germaniýaly Tomas Tuhel ýylyň tälimçisi baýragy bilen sylaglandy. Ol bu ugurda italiýaly Roberto Mançiniden hem-de ispaniýaly Pep Guardioladan öňe saýlandy. Zenan futbolynda geçen ýylyň iň gowy tälimçisi diýlip, Çelsi toparynyň tälimçisi – angliýaly Emma Haýes ykrar edildi. Çelsiniň senegally derwezeçisi Eduard Mendi ýylyň erkek derwezeçisi, çilili Kristiane Endler (PSŽ/Lion) ýylyň zenan derwezeçisi diýlip saýlandy.
Ýylyň iň owadan golun berilýän Puşkaş baýragyna Arsenal duşuşygynda geçiren goly üçin Tottenhamyň argentinaly ýyldyzy Erik Lamela mynasyp boldy.
FIFA Fair Play baýragy Kristian Erikseniň halas edilmeginde uly rol oýnan Daniýanyň ýygyndysy hem-de saglyk toparyna gowşuryldy. FIFA janaköýer baýragy-da Daniýa-Finlýandiýa duşuşygyndaky janköýerlere berildi.
FIFA-nyň ýörite baýragyna erkekleriň hem-de zenanlaryň arasynda milli ýygyndylaryň iň köp gol geçiren oýunçylary, degişlilikde, portugaliýaly super ýyldyz Kristiano Ronaldo bilen kanadaly Kristine Sinkleýr mynasyp boldy.
Ýylyň simwolik toparlary
FIFA-nyň hem-de FIFPro-nyň bilelikde saýlan ýylyň simwolik ýygyndysyna-da şu futbolçylar atlaryny ýazdyrmagy başardylar:
Erkekler: Janluiji Donnarumma; Ruben Diaş, Leonardo Bonuççi, Dawid Alaba; N’Golo Kante, Žoržinio, Kewin De Bruýne; Kristiano Ronaldo, Erling Holann, Lionel Messi, Robert Lewandowski
Zenanlar: Kristine Endler; Lusi Bronz, Wendi Renar, Milli Braýt, Magdalena Eriksson; Estafania Banini, Karli Lloýd, Barbara Bonansea; Wiwianne Miedema, Aleks Morgan, Marta
