NBC teleýaýlymy Ýewrowideniýe aýdym-saz bäsleşiginiň Amerikan nusgasyny geçirer. Amerikan aýdym ýaryşy ady bilen geçiriljek bäsleşikde çykyş edenlere ştatlar baha berer. Ýewrowideniýede bolsa ýurtlar baha berýär. Bu bäsleşikde 50 ştatdan, bäş amerikan sebitinden we Waşingtondan (resmi ady: Kolumbiýa okrugy) toparlar gatnaşarlar.
Ýewrowideniýe aýdym-saz bäsleşigi 1956-njy ýyldan bäri geçirilip gelinýär. Bu ýaryşa Ýewropa Teleýaýlym Bileleşigine agza ýurtlaryň wekilleri gatnaşýar. Ýaryşyň final tapgyryndan öň iki sany ýarym final tapgyry geçirilýär. Bu ýaryşda ýeňiji hem emin agzalarynyň, hem-de tomaşaçylaryň ses bermegi arkaly kesgitlenýär. NBC Amerikan aýdym-saz bäsleşiginiň nähili geçiriljekdigini doly aýtmady.
