Şu gün, 25-nji fewralda «Türkmenistan» teleradioýaýlymlar merkeziniň mejlisler jaýynda «Dünýä jemgyýetçiliginde Türkmenistanyň ösüşinde köpçülikleýin habar beriş serişdeleriniň ähmiýeti» atly halkara media forumy geçirildi.
Media forumyna ýurdumyzyň köpçülikleýin habar beriş serişdeleriniň wekilleri, daşary ýurtlaryň habar beriş serişdeleriniň Türkmenistanda akkreditirlenen habarçylary gatnaşdy. Şeýle hem bu foruma daşary ýurtlaryň köp sanly iri habarlar gulluklarynyň wekilleri onlaýn tertipde gatnaşdy.
Forumda Türkmenistanyň Prezidentiniň baştutanlygynda ýurdumyzda alnyp barylýan giň gerimli özgertmeler barada giňişleýin maglumat berildi. Ýurdumyzyň ösüşleriniň we gazanylan üstünlikleriň giňden wagyz edilmegine köpçülikleýin habar beriş serişdeleriniň ähmiýetiniň uludygy bellenildi.
Media forumda Aziýa Ýuwaş ummany teleradioýaýlymlar birleşiginiň (ABU) Baş sekretary Jawad Mottagi, Türkiýäniň «TRT Avaz» teleýaýlymynyň başlygy Sedat Sagirkaýa, Özbegistan Respublikasynyň Milli teleradiokompaniýasynyň başlygy Alişer Hajaýew, «Jaheen’s we Click Media» kompaniýasynyň esaslandyryjysy we ýolbaşçysy hanym Noha Jaheen, «TASS» habarlar agentliginiň baş direktorynyň birinji orunbasary Mihail Gusman we beýleki köp sanly daşary ýurtly metbugat wekilleri onlaýn ýagdaýda çykyş etdiler. Olar öz çykyşlarynda wekilçilik edýän köpçülikleýin habar beriş serişdelerinde ýurdumyzdaky ösüşleri beýan edýän materiallaryň berilendigini, mundan beýläk hem täze gepleşikleri taýýarlanyp, dünýä ýurtlarynyň tomaşaçylaryna ýetiriljekdigini aýtdylar. Şeýle metbugat ulgamyndaky bu hyzmatdaşlygy «Halkyň Arkadagly zamanasy» ýylynda hem dowam etdiriljekdigini bellediler.
