Futboldaky iň uly şahsy sylag hasaplanýan “Altyn top” (Ballon d’Or) baýragynyň ýeňijisi mundan soň täze düzgünler esasynda kesgitlener. “France Football” žurnaly tarapyndan gowşurylýan baýrak mundan soň kalendar senenamasy boýunça däl-de möwsüm esasynda, ýagny 2022-nji ýyl üçin däl-de 2021/22 möwsümi üçin berler. Şeýle-de, FIFA-nyň reýtingindäki 100 milli ýygyndynyň degişli wekilleri ses berlişige gatnaşar. Ozal ähli ýygyndynyň degişli wekilleri ses berýärdi. Ýene bir düzgün – ol hem futbolçynyň şahsy görkezen başarnyklary hasaba alynýar. Toparynyň, ýygyndysynyň gazanan kuboklary däl-de, futbolçynyň özüniň şahsy görkezijiler esas hökmünde kabul ediler.
“Altyn top” baýragynyň käbir gowşurylan ýyllarynda uly jedelli gürrüňler ýüze çykypdy. Guramaçylar şol jedelli gürrüňleri azaltmak maksady bilen şeýle işe baş goşdular. Ýeri gelende aýtsak, baýragy soňky gezek PSŽ-niň super ýyldyzy Lionel Messi alypdy.
