Ispaniýanyň çempionaty La Ligada El Klasiko oýnalyp, duşuşyk katalonlaryň uly hasaply ýeňşi bilen tamamlandy. Santiago Bernabeu stadionynda duşuşan Real Madrid bilen Barselonanyň arasynda 249-njy resmi El Klasikoda myhmanlar 4-0 hasabynda ýeňiş gazandy. Her ýarymda 2 gol geçiren katalonlaryň adyndan Pier-Emerik Obameýang (29, 51), Ronald Arauho (38) hem-de Ferran Torres (47) tapawutlandy. Şeýlelikde, şu asyra geçip, köne garşydaşyny 9-njy gezek uly hasap bilen ýeňen Barselona topary Real Madridi 5 duşuşykdan soň ilkinji ýola ýeňlişe sezewar etdi. Bu olaryň umumylykda resmi duşuşyklar boýunça 97-nji ýeňşi boldy. Bu ýeňişden soň Barselonanyň bir oýny kem bolup, ol sanawyň lideri Real bilen arasyndaky utuk aratapawudyny 12-ä düşürdi.
La Ligada sanawyň lideriniň utuk gazanyp bilmedik tapgyrynda 2-nji ýerdäki Sewilýa hem ýeňiş gazanmak başartmady. Sewilýa öz meýdançasynda Real Sosiedad bilen Betis bolsa myhmançylykda Selta bilen golsuz deňme-deň oýnady. Soňky çempion Atletiko Madrid myhmançylykda Raýo Wallekanony Kokeniň ýeke-täk goly bilen 1-0 ýeňdi.
