UEFA Ýewropa Ligasynda Barselona topary ilki deňme-deň oýnap, jogap oýunlarynda ýeňiş gazanyp gelýärdi. Şeýle hasaplar bilen Napolini, soňra Galatasaraýy ýaryşdan çykaran Barselona çärýek finalda Aýntraht bilenem 1-nji oýunda deňme-deň oýnady. Ýöne jogap duşuşygynda katalonlaryň ol statistikasy öz güýjüni ýitirdi. Barselona topary öz meýdançasynda Aýntrahtdan 3-2 asgyn geldi. Nemes kluby Kostiç (2) we Burreniň gollary bilen 3-0 öňe saýlandy. Duşuşygyň ahyrynda ýer eýeleri 2 gol geçirdi (Buskets 90+1, Depaý 90+11 p). Ýöne bu gollar katalonlaryň ýaryşy dowam etdirmegi üçin ýeterlik bolmady.
Şeýle-de West Ham myhmançylykda Liony 3-0 (Dawson 38, Raýs 44, Bowen 48), Leipsig hem myhmançylykda Atalantany 2-0 (Nkunku 18, 87 p) ýeňip, ýarym finala çykmagy başardy.
1-nji oýunda 1-0 asgyn gelen Reýnjers öz meýdançasynda Bragany kabul etdi. 1-nji ýarymda Tawernieriň gollary bilen (2, 44 p) 2-0 öňe saýlanan şotlandlar 83-nji minutda Karmonyň goluny saklap bilmediler. Netijede, ýeňiji goşmaça wagtda belli bolup, Reýnjers 101-nji minutda Rufuň goly bilen ýeňşini baýram etdi.
Ýarym finalda Leipsig bilen Reýnjers, West Ham bilenem Aýntraht duşuşar. 1-nji duşuşyklar 28-nji aprelde, jogap oýunlary 5-nji maýda oýnalar. Ýeňijiler 18-nji maýda Sewilýa şäherindäki finalda duşuşarlar.
