“Apple” kompaniýasy mundan ozal ulanyjylaryň mobil enjamlaryny özleriniň bejermekleri üçin maksatnamany ýola goýjakdygyny mälim edipdi. Indi bolsa, “iPhone” enjamlary üçin ätiýaçlyk şaýlarynyň satuwyny ýola goýdy. Bu maksatnamanyň çäklerinde “Apple” hakyky “iPhone” ätiýaçlyk şaýlaryny we bu şaýlary oturtmak üçin gurallary we gözükdirmeleri hödürläp başlady. Ilkinji nobatda, ABŞ-da ýola goýlan bu maksatnama ýylyň ahyrynda Ýewropada hem ýola goýlar. “Özüň bejer!” atly maksatnamanyň çäklerinde “selfservicerepair.com” saýtynda häzirlikçe “iPhone 12”, “iPhone 13” we “iPhone SE” smartfonlary üçin batareýa, ekran, ses gataldyjy we kamera ýaly hakyky ätiýaçlyk şaýlary satuwa hödürlenýär. Geljekde “Mac” kompýuterleriniň ätiýaçlyk şaýlary hem satylar. Şeýle hem, mobil enjamy bejermek üçin gerekli gurallar hem satylýar. Mysal üçin, “iPhone 12 Pro”-nyň batareýasyny çalşyp bolýan gural 70,99 dollar, kamera çalyşylýan enjam 116,72 dollar we ekran çalyşylýan enjam 269,95 dollar bahadan satylýar.
Begenç Garaýew, S.A.Nyýazow adyndaky Türkmen oba hojalyk uniwersitetiniň talyby.
