Futbol boýunça zenanlaryň arasyndaky 13-nji Ýewropa çempionatynda Angliýanyň, 9-njy Günorta Amerika çempionatynda-da Braziliýanyň ýygyndysy kubogy eýeledi. Angliýa 1-nji, Braziliýa 8-nji gezek çempion bolmagy başardy.
Angliýada geçirilen çempionatyň finalynda ýer eýeleri bilen Germaniýanyň ýygyndysy duşuşdy. “Wembley” stadionynda oýnalan finalyň 1-nji ýarymy golsuz tamamlandy. Duşuşygyň 62-nji minutynda 2-nji ýarymda oýna giren Ella Tun iňlisleriň öňe saýlady. 79-njy minutda Lina Magull hasaby deňledi. Duşuşygyň esasy wagty 1-1 hasabynda gutaryp, goşmaça 30 minut berildi. Goşmaça 30 minutyň hem ilkinji 15 minutynda hasap üýtgemedi. Duşuşygyň 110-njy minutynda jerime meýdançasynyň içindäki başagaýlykdan ýerlikli peýdalanan Hloe Kelli hasaby 2-1-e ýetirdi. Bu duşuşykdaky soňky gol bolup, Angliýanyň ýygyndysy taryhynda ilkinji gezek Ýewropanyň çempiony bolmagy başardy. Angliýanyň zenanlary ýygyndysy mundan öň 2 gezek finalda utulypdy. 1984-nji ýylda çempionlygy Şwesiýa, 2009-njy ýylda Germaniýa aldyran Angliýanyň ýygyndysynyň tälimçisi Sarina Wigman 2017-nji ýylda öz ýurdy Niderlandlardan soň iňlisleri hem çempion edip, taryhy başarnyk görkezdi.
Germaniýanyň ýygyndysy ilkinji gezek finalda utulyp, olar mundan öňki 8 finalda kubogy eýeläpdiler.
Angliýanyň ýygyndysynyň ýyldyz futbolçysy Bet Mid çempionatyň iň ökde oýunçysy diýlip saýlandy. 27 ýaşyndaky futbolçy germaniýaly Aleksandra Pop bilen bilelikde çempionatyň iň netijeli futbolçysy boldy. Oýunçylaryň ikisi hem 6 gol geçirdi. Popuň finalda şikesi sebäpli oýnap bilmändigini hem ýatladalyň. Germaniýaly Lena Oberdorf çempionatyň iň ökde ýaş oýunçysy baýragyna laýyk görüldi. Çempionata umumylykda 574 865 janköýer tomaşa etdi. Şolaryň 87 192-si finala duşuşygyna gatnaşdy. Bu bolsa zenanlary hem-de erkekleriň arasyndaky Ýewropa çempionatlarynyň iň köp tomaşaçyly finaly diýmekdir.
