Dört ýyl öňki bäsleşige görä, tejribe toplan FIFA 1932-nji ýylda Şwesiýanyň paýtagty Stokgolm şäherinde geçiren kongresinden soň 2-nji Dünýä Kubogyny Italiýada guramak barada karara gelýär. Bu gezek öňki ýaryşdan tapawutlylykda toparlar saýlama oýunlaryny geçirýär we 32 ýygyndynyň deň ýarysy, 16 ýygyndy Italiýadaky futbol baýramçyly
gynda çykyş etmäge ygtyýar alýar. Italiýanyň 8 şäherinde (Rim, Milan, Neapol, Florensiýa, Bolonýa, Genue, Tries
te, Turin) geçirilen çempionat üçin ýurduň hökümeti 3,5 million lirlik maliýe serişdesini goýberýär. Bu hem onuň çempionaty guraýjy ýurt bolmagynyň esasy sebäbi bolýar.
Italiýadan başga Şwesiýa hem çempionaty geçirmek üçin dalaşgär bolupdy.
UTULAN ÇYKÝAR
II Dünýä Kubogy geçen gezekki ýaly toparçalara bölünmän, utulan-çykdy esasynda geçirilýär. 1-nji tapgyrda oýnalan 8 duşuşyk hem şol bir wagtda başlanýar. 1-nji tapgyrda ýeňiş gazanyp, çärýek finala çykan ähli topar hem Ýewropanyň wekili bolýar. Duşuşyklar barada aýdylanda, ýer eýeleri Italiýa ABŞ-ny 7–1 hasabynda utup, şol wagta çenli iň uly hasap bilen ýeňiş gazanýar. Wittoriýa Pozzanyň tälimçiligindäki italýanlaryň gollaryny Skiawio (3), Orsi (2), Ferrari (1) hem-de Meazza (1) geçirýär. Afrikanyň adyndan wekilçilik eden ilkinji topar Müsüriň ýygyndysy Wengriýadan 4-2 hasabynda asgyn gelýär. Günorta Amerikanyň wekilleri Argentina Şwesiýadan 3-2, Braziliýa Ispaniýadan 3-1 utulyp, ýurtlaryna juda ir dolanmaly bolýarlar.
GAÝTADAN OÝNALANDA ÝEŇIŞ GAZANÝAR
Çärýek finalda Italiýa bilen Ispaniýa duşuşyp, oýnuň esasy wagtynda-da, goşmaça wagtynda-da ýeňiş gazanan bolmaýar (1-1). Şol wagtky düzgünlere görä (oýundan soňky penalti urgulary Dünýä Kubogynyň düzgünlerine girizilmändi), oýun ertesi gün täzeden oýnalmaly edilýär. Bu duşuşykda-da Juseppe Meazzanyň ýeke-täk goly bilen italýanlar ýeňiş gazanýar. Bu oýun Dünýä Kubogynyň taryhynda gaýtadan oýnalan ilkinji duşuşyk bolýar. Dawa-jenjelli, uruşly geçen oýunda Awstriýa Wengriýany, şol sanda, Germaniýa-da Şwesiýany 2-1 hasaplar bilen ýeňlişe sezewar edýär. Şweýsariýany kynlyk bilen utan çehler beýleki ýarym finalçy bolýar (3-2).
Milanda oýnalan Italiýa bilen Awstriýanyň arasyndaky duşuşykda oýnuň ykbalyny ýeke-täk gol kesgitläp, ony 19-njy minutda Enrika Guaita öz adyna ýazdyrýar. Rimde Çehoslowakiýa bilen Germaniýanyň ýygyndylary duşuşyp, çehler Oldrih Nežedliniň het-trigi bilen 3-1 hasabynda ýeňýär.
Final duşuşygy 10-njy iýunda paýtagt Rimde 45 müň janköýeriň şaýatlygynda oýnalýar. Bu duşuşyga şwesiýaly Iwan Eklind eminlik edýär. Birinji ýarymy golsuz geçen oýunda 71-nji minutda Antonin Puç çehleri öňe saýlaýar. 10 minutdan soň, italýanlar Raimundo Orsiniň goly bilen hasaby deňleýär we oýnuň esasy wagty 1-1 gutarýar. Goşmaça 30 minut berilýär. Hüjümlerini ýygjamlaşdyran Italiýa goşmaça berlen wagtyň 5-nji minutynda, has takygy, 95-nji minutda Anjelo Skiawionyň goly bilen 2-1 hasabynda ýeňiş gazanyp, Dünýä Kubogynyň eýesi bolýar. Şeýlelikde, Italiýa hem edil Urugwaý ýaly ýer eýesi hökmünde çempion bolan 2-nji topar bolýar.
3-nji ýer ugrunda iki goňşy döwlet Germaniýa bilen Awstriýa duşuşyp, çekeleşikli geçen oýunda 3-2 hasabynda nemesler ýeňiş gazanýar (Lener 1, 12, Konen 27 – Horwat 28, Sesta 54).
Çempionatda geçirilen oýunlar:
1-nji tapgyr: Italiýa-ABŞ: 7-1, Ispaniýa-Braziliýa: 3-1, Awstriýa-Fransiýa: 3-2, Wengriýa-Müsür: 4-2, Çehoslowakiýa-Rumyniýa: 2-1, Şweýsariýa-Niderlandlar: 3-2, Germaniýa-Belgiýa: 5-2, Şwesiýa-Argentina: 3-2.
Çärýek final: Italiýa-Ispaniýa: 2-1, Awstriýa-Wengriýa: 2-1, Çehoslowakiýa-Şweýsariýa: 3-2, Germaniýa-Şwesiýa: 2-1.
Ýarym final: Italiýa-Awstriýa: 1-0, Çehoslowakiýa-Germaniýa: 3-1.
3-nji ýer üçin: Germaniýa-Awstriýa: 3-2.
Final: Italiýa-Çehoslowakiýa: 2-1.
Käbir maglumatlar:
* Müsüriň milli ýygyndysy Dünýä Kubogyna gatnaşan ilkinji Afrika topary, şol bir wagtyň özünde-de ilkinji musulman ýurt hökmünde hasaba alynýar.
* Braziliýanyň milli ýygyndysy Italiýa gelmek üçin 11 günläp gämi bilen ummany geçmeli bolýar.
* Duşuşyklar çempionata gatnaşan ýurtlaryň 12-sinde radioýaýlym arkaly halka ýetirilýär.
* Urugwaý 1930-njy ýylda Ýewropa ýurtlarynyň köpüsiniň gatnaşmandygyna nägilelik bildirip, Italiýadaky çempionata gelmekden ýüz öwürýär. Şeýlelikde, Urugwaý çem
pion bolup-da indiki ýaryşa gatnaşmadyk ýeke-täk topar hökmünde taryha girýär.
* Peru hem-de Çiliniň saýlama oýunlaryna gatnaşmakdan boýun towlamagy sebäpli Braziliýadyr Argentina duşuşyk geçirmezden gönümel final tapgyryna gatnaşýar.
* Çempionatda ilkinji gezek “The Federale 102” atly resmi markaly top ulanylýar.
* Çehoslowakiýanyň hüjümçisi Oldrih Needli 4 duşuşykda 5 gezek tapawutlanyp, “Altyn butsy” baýragyna mynasyp bolýar.
* Argentinaly Luis Monti 2-nji gezek final oýnunda çykyş edýär. 4 ýyl öň argentinleriň hatarynda çykyş eden Monti, 1934-nji ýylda Italiýanyň milli ýygyndysynyň köýnekçesini geýýär. Ol Dünýä Kubogynyň finalynda iki dürli ýygyndyda çykyş eden ýeke-täk futbolçydyr.
ITALIÝA 1934 DÜNÝÄ KUBOGY
Çempion: Italiýa
Finalçy: Çehoslowakiýa
3-nji ýer: Germaniýa
4-nji ýer: Awstriýa
Gatnaşan toparlar (16): ABŞ, Argentina, Awstriýa, Belgiýa, Braziliýa, Çehoslowakiýa, Wengriýa, Fransiýa, Germaniýa, Ispaniýa, Italiýa, Niderlandlar, Rumyniýa, Şwesiýa, Şweýsariýa
Geçirilen wagty: 27-nji maý – 10-njy iýun (1934)
Oýnalan duşuşyk: 17
Geçirilen gollar: 70 (ortaça 4,12)
Tomaşaçy: 363 000 (21,353)
