UEFA-nyň iň uly klub ýaryşy bolan Çempionlar Ligasynyň 3,5 aýa golaý arakesmesi tamamlanar. Sişenbe güni, ýagny ertir 14-nji fewralda 2 duşuşyk bilen UEFA Çempionlar Ligasynyň 1/8 finalyna badalga berler.
1/8 finalyň ilkinji 2 duşuşygynda “Milan” öz meýdançasynda “Tottenhamy”, PSŽ bolsa “Bawariýany” kabul eder. “Milan” bilen “Tottenham” UEFA-nyň ýaryşlarynda 3-nji gezek duşuşar. Mundan öňki 2 oýunda “Tottenham” 1-0 hasabynda ýeňiş gazanyp, beýleki duşuşyk hem golsuz tamamlanypdy. Ertirki duşuşykda şweýsariýaly Sandro Şärer jürlewük çalar.
Wagtyndan öňki final hasaplanýan PSŽ bilen “Bawariýanyň” duşuşygy-da şol günüň esasy oýny bolar. Iki topar mundan ozal 11 gezek duşuşyp, PSŽ 6, “Bawariýa” 5 gezek ýeňiş gazandy. Iki topar hem 15 gol geçirdi. Hemmäniň sabyrsyzlyk bilen garaşýan bu duşuşygyna angliýaly Maýkl Oliwer eminlik eder. Duşuşykda azda-kände şikesi bolan Mbappe bilen Messiniň hem oýnamagy mümkin. Oýunçylaryň ýagdaýy duşuşygyň öňüsyrasynda belli bolar.
ILKINJI GEZEK DUŞUŞÝARLAR
Çarşenbe günki, ýagny 15-nji fewraldaky duşuşyklarda-da “Borussiýa Dortmund” bilen “Çelsi” hem-de “Klub Brýugge” bilen “Benfika” özara güýç synanyşar. Şol günki oýunlar toparlaryň öz arasyndaky ilkinji resmi duşuşyklar bolar.
GALAN DUŞUŞYKLAR GELJEK HEPDEDE OÝNALAR
1/8 finalyň galan 4 duşuşygy-da soňky hepdäniň sişenbe we çarşenbe günleri oýnalar. 21-nji fewralda başga bir wagtyndan irki final hasaplanýan duşuşykda “Liwerpul” topary “Real Madridi” kabul eder. Şeýle-de, “Aýntraht” bilenem “Napoli” çärýek finala çykmak üçin göreşer. Geçen ýylyň finalynda duşuşan “Liwerpul” bilen “Real Madrid” 10-njy gezek meýdança çykarlar. Ozalky 9 oýunda “Real” 5, “Liwerpul” 3 gezek ýeňiş gazandy (1 oýun deňlik). Ispan kluby 11 gol geçirip, 8 gol geçirtdi. “Aýntraht” bilen “Napoliniň” arasyndaky öňki 2 oýunda nemes kluby 1-0 hasaplar bilen ýeňiş gazandy.
22-nji fewralda-da “Lepsig” bilen “Mançester Siti” hem-de “Inter” bilenem “Porto 1/8 finalyň 1-nji oýunlaryny geçirerler. “Leipsig” bilen “Mançester Siti” mundan öň hersi 1 gezek ýeňiş gazandy. Çekeleşikli geçen şol 2 oýunda “Siti” 7, “Leipsig” 5 gol geçiripdi. 22-nji fewraldaky “Inter”–“Porto” duşuşygy 2 klubuň arasyndaky 5-nji oýun bolar. Öňki 4 oýunda “Inter” 2, “Porto” 1 gezek ýeňiş gazandy.
Bu duşuşyklaryň jogap oýunlary 7–8-nji hem-de 4–15-nji martda geçiriler.
