UEFA Ýewropa Ligasynda UEFA Çempionlar Ligasyny ýadyňa salýan duşuşykda ýeňiş gazanan bolmady. Ýagny “Barselona” öz meýdançasynda “Mançester Ýunaýtedi” kabul edip, 2-2 hasabynda deňme-deň oýnady. Oýnuň 50-nji minutynda “Barselonadan” golaýda kakasy aradan çykan Markos Alonso tapawutlandy. Ýöne iňlis klubunyň jogaby gijikmedi. Soňky aýlaryň iň netijeli oýunçysy Markuş Reşford bu duşuşygy hem boş tamamlamady. Ol 53-nji minutda hasaby deňledi. 59-njy minutda ýene-de Reşfordyň tagallasy bilen “Mançester Ýunaýted” öňe saýlandy. Bu goly Žýul Kunde ýalňyşlyk bilen öz derwezesinden girizdi. Oýnuň 76-njy minutynda-da Rafinýa uzakdan urgusy hiç bir futbolça degmän derwezä girdi we hasap deňlendi. Duşuşykda italiýaly emin Maurizio Marianiniň “Barselonanyň” peýdasyna 2 penalti urgusyny bellemändigi bellenilýär. Duşuşykda şikes alan Pedri hem-de sary kart alan Gawi jogap duşuşygynda çykyş edip bilmez.
Ýewropa Ligasynda “Ýuwentus” öz meýdançasynda “Nant” bilen 1-1 deňme-deň oýnaýar (Wlahowiç 13 – Blas 60). Edil şonuň ýaly netije “Sporting” bilen “Midtýullanyň” arasyndaky oýunda-da hasaba alnyp, portugal kluby 90-njy minutdan soň ýeňlişden halas bolýar (Koates 90+4 – Aşur 77). “Aýaks” bilen “Union Berliniň” arasyndaky duşuşykda hasap açylmaýar. “Şahtýor Doneskiň” “Renn” toparyny 2-1 (Kriskiw 11, Bondarenko 45 p – Toko Ekambi 59) ýeňen tapgyrynda “RB Salsburg” öz meýdançasynda “Romadan” Kapaldonyň 88-nji minutdaky goly esasynda 1-0 üstün çykýar. 5 goluň geçirilen duşuşygynda-da “Baýer” öz meýdançasynda “Monakodan” 3-2 asgyn geldi. Fransuz kluby ýeňiş goluny 90-njy minutdan soň geçirdi (Diabi 48, Wirts 59 – Hradeki 9 ö.d., Diatta 74, Disasi 90+2). Bu kubogy iň köp gazanan topar “Sewilýa” ýene-de şol ýeňişleriniň hataryna birini goşmak üçin ilkinji ädimi şowly tamamlady. Öz meýdançasynda PSW-niň En-Nesiriniň (45+2), Okamposyň (50) hem-de Gudelžiň (55) owadan gollary bilen 3-0 ýeňen “Sewilýa” 1/8 finala çykmak ugrunda uly mümkinçilik gazandy.
Jogap duşuşyklary geljek hepdäniň penşenbe güni, aýgny 23-nji fewralda geçiriler.
Ýewropa Ligasynda pleý-off tapgyrynyň 1-nji oýunlarynyň netijeleri:
“Ýuwentus”–“Nant”: 1-1
“Sewilýa”– “PSW Eýndhowen”: 3-0
“Aýaks”–“Union Berlin”: 0-0
“RB Salsburg”–“Roma”: 1-0
“Baýer”–“Monako”: 2-3
“Barselona”–“Mançester Ýunaýted”: 2-2
“Şahtýor Donesk”–“Renn”: 2-1
“Sporting”–“Midtýullan”: 1-1
