Ispaniýanyň çempionatynda sanawyň öňdebaryjy 2 topary-da 22-nji tapgyrda 2-0 hasabynda ýeňiş gazandylar. “Barselona” öz meýdançasynda “Kadizden” 3 minutda geçiren gollary esasynda 2-0 üstün çykdy. Katalonlara ýeňiş getiren gollary Serhio Roberto (43) we onuň pasyndan soň Robert Lewandowski (45+1) geçirdi. Şu möwsümde 22 duşuşygy 17-sinde derwezesine gol goýbertmedik “Barselona” çempionatyň rekordyny täzeledi. Mundan öňki rekord 16 duşuşyk bilen “Deportiwo” toparyna degişlidi (1993/94). 22 oýunda 7 gol geçirden katalonlar bu ugurda “La Liganyň” rekordyny täzeledi. Öňki rekordlar 22 oýunda 9 gol geçirden “Barselona” (1986/87), “Deportiwo” (1993/94) hem-de “Atletiko” (2017/18) klublaryna degişlidi. “Barselona” 13 oýundan bäri çempionatda ýeňlişsiz barýar.
“Real Madrid” hem myhmançylykda “Osasunany” Walwerde (78) hem-de Asensionyň (90+2) gollary esasynda 2-0 ýeňdi. “Atletikonyň” “Atletigi” Grizmannyň goly bilen 1-0 ýeňen tapgyrynda “Sewilýa” myhmançylykda “Raýo Wallekano” bilen utuklary paýlaşdy.
