UEFA Ýewropa Ligasynda çempionlygyň dalaşgärlerinden diýlip görkezilýän Barselona üçin ýaryş bu ýylam ir tamamlandy. Geçen möwsümde çärýek finaldan yzyna gaýdan katalonlar bu möwsümde pleý-off tapgyryny geçip bilmän 1/8 finala-da çykyp bilmedi. Öz meýdançasynda Mançester Ýunaýted bilen 2-2 deňme-deň oýnan Barselona myhmançylykda 2-1 hasabynda asgyn geldi. Robert Lewandowskiniň 18-nji minutdaky penaltiden geçiren goly bilen Barselona öňe saýlansa-da, Mançester Ýunaýted 2-nji ýarymda ýeňiş gazanmagy başardy. Mankunianlara ýeňiş getiren gollary braziliýaly oýunçylar Fred (47) bilen Antoni (73) derwezä girizdi.
Turindäki oýundaky Nanty ýeňip bilmedik Ýuwentus myhmançylykda 3-0 hasabynda ýeňşini baýram etdi. 17-nji minutda goragçysy (Pallua) gyzyl kart alan Nantyň derwezesinden gollaryň 3-sini hem Anhel Di Mariýa geçirdi. Di Mariýa Ýuwentusyň myhmançylykda Ýewrokuboklardaky het-trik eden 4-nji futbolçysy boldy.
Ýuwentusdan soň başga bir italýan kluby hem 1/8 finala çykdy. RB Salsburg toparyny Belotti we Dibalanyň gollary bilen 2-0 ýeňen Roma 1/8 finalda oýnamaga hukuk gazandy. 1-nji oýun 1-0 hasabynda salsburglylaryň peýdasyna tamamlanypdy.
Edil italýanlar ýaly nemesleriň hem 2 kluby pleý-off tapgyrynda ýeňiş gazanmagy başardy. Amsterdamdaky golsuz gutaran oýnuň jogap duşuşygynda Union Berlin öz meýdançasynda Aýaksy 3-1 hasabynda ýeňdi (Knoçe 20 p, Ýuranowiç 44, Doekhi 50 – Kudus 47). Lewerkuzeniň Baýeri hem 1/8 finala çykyp, ol Monakony ýaryşdan çykardy. Öz meýdançasynda 3-2 asgyn gelen lewerkuzenliler myhmançylykda şol hasap bilen ýeňiş gazandy (Ben Ýedder 19 p, Embolo 84 – Wirts 13, Palasios 21, Adli 58). Iki oýnuň netijesi boýunça hasap deň bolup, ýeňijini penalti urgulary kesgitledi. Netijede, 5-3 öňe saýlanan nemes kluby ýaryşy dowam etdirer.
Öz meýdançasynda 3-0 ýeňen Sewilýa myhmançylykda soňky minutlardakynçylykly pursatlary başdan geçirdi. Çekeleşikli we dargtynly geçen oýunda PSW De Ýong (77) hem-de Fabio Silwanyň (90+5) gollary bilen 2-0 ýeňdi. Ýöne bu ýeňiş eýndowenlilere ýeňiş üçin ýeterlik bolmady.
Öz meýdançasynda soňky minutda ýeňlişden halas bolan Sporting myhmançylykda Midtýullandy 4-0 hasabynda utdy. Elbetde bu ýeňişde ýer eýeleriniň 38-nji minutdan soň 1 oýunçy kem oýnamagynyň täsiri az bolmady.
1-nji oýundaky hasabyň gaýtalanan başga bir jogap duşuşygynda Renn bilen Şahtýor Donesk duşuşdy. 1-nji oýunda ukrain kluby 2-1 ýeňiş gazanypdy. Jogap oýnunyň esasy wagtynda fransuz kluby Toko Ekambiniň goly bilen 1-0 öňe saýlandy. Goşmaça wagtda fransuzlar Ibrahim Salahyň goly bilen aratapawudy 2-ä çykardylar. Ýöne 119-njy minutda Beloçianyň awtogolundan soň ýeňijini penaltiler kesgitlemeli boldy. Bu urgularda-da 5-4 öňe saýlanan Şahtýor Donesk 1/8 finala çykdy.
