Ýaryşyň iň köp çempionlyk gazanan kluby we häzirki çempiony “Real Madrid” ýene-de güýçli garşydaşy “Liwerpuly” ýaryşdan çykarmagy başardy. Soňky oýunlarda “Liwerpula” ot ýakdyrmadyk “Real Madrid” topary “Liwerpuly” öz meýdançasynda-da ýeňlişe sezewar etdi. “Anfield”-de 5-2 ýeňiş gazanan “Reala” öz meýdançasynda iň kiçi hasaply ýeňiş hem ýeterlik bolup, ýer eýeleri birnäçe amatly pursatlardan peýdalanyp bilmedi. Duşuşykdaky ýeke-täk goly 78-nji minutda Karim Benzema geçirip, ol pleý-off tapgyrlaryndaky 33-nji goluny öz adyna ýazdyrdy. Fransiýaly hüjümçi bu ugurda Kristiano Ronaldo (67) hem-de Lionel Messiden (49) soň 3-nji ýeri eýeleýär. Iňlis klublarynyň derwezesinden 19-njy goluny geçiren Benzema bu babatda bolsa 27 golly Lionel Messiden soň 2-nji orunda barýar. Şunlukda, “Real Madrid” umumy hasapda 6-2 öňe saýlanyp, yzly-yzyna 3-nji, umumylykda-da 19-njy gezek çärýek finala çykdy. “Real Madrid” topary çärýek finala çykmakda diňe “Bawariýadan” yza galýar. UEFA Çempionlar Ligasyndaky 300-nji duşuşygyny geçiren “Real Madrid” topary bu görkezijä ýeten ilkinji klub hökmünde hasaba alyndy.
