Aziýa klublarynyň 2-nji derejeli ýaryşy AFK Kubogynyň pleý-off tapgyrynda Marynyň “Merw” topary ýeňiş gazanyp, taryhynda ilkinji gezek toparçalarda çykyş etmäge hukuk gazandy. Myhmançylykda Täjigistanyň “Hujand” topary bilen duşuşdy. Esasy wagty 1-1 tamamlananda oýunda ilkinji bolup, “Merw” öňe saýlandy. Duşuşygyň 54-nji minutynda Murat Ýakşiýew hasaby açdy. Oýnuň 79-njy minutynda-da täjik kluby Parwiz Bakiýew hasaby deňledi. Netijede, galan minutlarda-da üýtgän zat bolmady we goşmaça 30 minut berildi.
Goşmaça wagtyň ilkinji 15 minutynda skorborddaky sanlarda üýtgeşiklik bolmady. 2-nji 15 minutda-da erjel oýun görkezen “Merw” topary 114-nji minutda Myrat Öwezmyradow goly bilen 2-1 öňe saýlandy. Bu duşuşykdaky soňky gol boldy. Şunlukda, iki atdaş futbolçysynyň, ýagny Myratlaryň gollary bilen 2-1 hasabynda ýeňiş gazanan “Merw” topary AFK Kubogynda toparçalarda çykyş eder. “Merw” topary Merkezi Aziýa zolagynyň toparçasynda ýurdumyzyň wekili “Altyn asyr”, şol sanda Täjigistanyň “Rawşan”, Gyrgyzystanyň “Abdyş-Ata Kant” toparlary bilen duşuşar. Toparçalardaky duşuşyklar 18-nji sentýabrda başlap, 14-nji dekabrda tamamlanar.
