UEFA Çempionlar Ligasynda “A” toparçada “Bawariýa” myhmançylykda “Galatasaraý” toparyny 3-1 hasabynda ýeňlişe sezewar etdi. Nemes klubunyň gollaryny 8-nji minutda Koman, 73-nji minutda Keýn, 79-njy minutda-da Musiala geçirdi. 1-nji ýarymda erjel oýun görkezip, birnäçe amatly pursatlardan peýdalanyp bilmedik türk klubunyň ýeke-täk goluny 30-njy minutda penaltiden Mauro Ikardi derwezä girizdi. Şunlukda, “Bawariýanyň” toparçadaky ýeňilmezlik seriýasy 37 oýna çykdy. Toparçalarda 37 oýundan bäri ýeňilmän gelýän “Bawariýa” bu ugurda öz rekordyny ösdürmegini dowam edýär. Toparçalarda myhmançylykda 8-nji, umumylykda-da 16-njy ýeňşini gazanan münhenliler bu iki görkeziji boýunça-da rekordyň eýesidir.
