14-nji ýanwarda Daniýany 52 ýyl dolandyran Margrete II tagtdan çekilenden soň, Frederik X ýurduň täze Patyşasy boldy.
Margrete II Kristiansborg köşgünde geçirilen dabarada tagtdan çekilýändigi baradaky karara gol çekdi. Şondan soň onuň ogly Frederik ýurduň täze monarhy boldy. Daniýanyň Şa zenany Margrete II, Täze ýyl ýüzlenmesinde, 2024-nji ýylyň 14-nji ýanwarynda tagtda bolmagynyň 52 ýyllygynda tagtdan çekiljekdigini habar beripdi. Şonda 83 ýaşly Şa zenan tagty öz ogly, mirasdüşer şazada Frederike tabşyrjakdygyny mälim edipdi.
Mundan öň Daniýanyň Patyşa köşgi Şa zenan Margrete II-niň Daniýanyň taryhynda özünden öňküleriň ählisinden has uzak wagtlap Patyşa tagtynda bolandygyny habar beripdi.
Daniýanyň Premýer-ministri Mette Frederiksen Kristianborg köşgüniň balkonyndan Frederik X-y Patyşa diýip yglan etdi. Şeýle hem Şa zenan Margrete 52 ýyllyk hökümdarlygy üçin hoşallyk bildirdi. Mundan başga-da, Daniýanyň Patyşasy Frederik X flotuň admiraly, ýurduň gury ýer we harby-howa güýçleriniň dört ýyldyzly generaly derejesine eýe boldy.
Margrete ýurduň soňky 900 ýyllyk taryhynda tagtdan meýletin çekilen ilkinji monarh boldy. Köşgüň golaýyndaky meýdançadan müňlerçe daniýaly Onuň Alyjenaby Frederik X-y hem-de aýaly Mariýany we çagalaryny mübäreklediler. Olaryň 18 ýaşly uly ogly Kristian resmi taýdan Daniýanyň şazadasy boldy.
