Donald Tramp, Aýowa ştatynda ABŞ-nyň Respublikan partiýasyndan dalaşgärler üçin geçirilen ses berişlikde ýeňiş gazandy. Öňki döwlet Baştutany sesleriň 50%-den gowragyna eýe boldy.
Aýowa, saýlawdan öňki ses berişligi geçiren ilkinji ştat bolup, ol respublikan dalaşgärleriň geljekki saýlawlara taýýarlygynyň “synagy” hasaplanýar. Mundan başga-da, habar beriş serişdeleriniň habaryna görä, Trampyň Aýowa ştatynda ýeňşi öňünden bellidi.
ABŞ-da indiki Prezident saýlawlary şu ýylyň 5-nji noýabr aýynda meýilleşdirilýär. Bu saýlawlara häzirki Prezident Jozef Baýden gatnaşmadyk ýagdaýynda, ABŞ-nyň 47-nji prezidentiniň saýlanyp bilinjek 60-njy prezident saýlawlary bolar. 2022-nji ýylyň 15-nji noýabrynda ABŞ-nyň 45-nji Prezidenti Donald Tramp saýlaw kampaniýasynyň başlanandygyny habar berdi. 2023-nji ýylyň 25-nji aprelinde häzirki Prezident Jozef Baýden öz dalaşgärligini yglan etdi. Şu ýylyň 16-njy ýanwarynda Aýowa ştatynda geçirilen respublikan saýlawlarynda Tramp öňdeligi eýeledi, Florida ştatynyň gubernatory Ron Desantis ikinji, BMG-niň öňki hemişelik wekili üçünji orny eýeledi.
ABŞ-nyň Konstitusiýasynyň 2-nji maddasyna laýyklykda, Prezident wezipesine saýlanmak üçin dalaşgäriň ýaşy 35-den kiçi bolmadyk ABŞ-nyň raýaty bolmaly we bu ýurtda azyndan 14 ýyl ýaşan bolmaly. Dalaşgärler, düzgün boýunça saýlawlardan öňki ses berişligiň netijelerine görä, syýasy partiýalary tarapyndan ýa-da öz-özüni görkezmek arkaly hödürlenýär. Saýlanan prezidentiň kasam kabul edişlik dabarasy 2025-nji ýylyň 20-nji ýanwaryna meýilleşdirilýär.
