ABŞ-da dowam edýän FIFA Klublar Dünýä Kubogy ýaryşynda toparçadan çykmagy başaran Aziýa yklymynyň ýeke-täk wekili “Al Hilal” çärýek finalda oýnar.

Toparçada “Real Madrid” toparyndan ýeňilmedik “Al Hilal” kluby 1/8 finalda “Mançester Siti” bilen duşuşdy. Orlandoda geçirilen duşuşykda janköýerler 7 goluň şaýady boldular. Esasy wagty deňlikde gutaran oýunda ýeňiji goşmaça wagtda belli boldy.

Duşuşygyň 1-nji ýarymy Bernardo Silwanyň 9-njy minutda geçiren goly esasynda iňlis klubunyň üstünliginde tamamlandy. 2-nji ýaryma gol bilen başlan “Al Hilal” 46-njy minutda Markos Leonardonyň goly esasynda hasaby deňläp, 52-nji minutda Malkomyň gol geçirmeginde öňe hem saýlandy. Ýöne dessine jogap beren “Mançester Siti” 55-nji minutda Erling Holannyň goly bilen hasaby deňledi. Duşuşygyň esasy wagty 2-2 deňlikde tamamlandy.

Goşmaça wagtda-da “Al Hilal” topary 94-nji minutda Kalidu Kulibaliniň goly bilen öňe geçdi. 10 minutdan soň Fil Foden hasaby deňlese-de, 112-nji minutda Markos Leonardo “Al Hilaly” 4-nji gezek öňe çykaryp, oýna soňky nokady goýdy. Şunlukda, 4-3 hasabynda ýeňiş gazanan “Al Hilal” topary çärýek finala çykdy.

“Al Hilal” toparynyň täze tälimçisi Simone Inzagi 2023-nji ýylda UEFA Çempionlar Ligasynyň finalynda Inter bilen ýeňip bilmedik “Mançester Siti” toparyny arap kluby bilen utmagy başardy.

“Al Hilal” çärýek finalda “Fluminense” topary bilen duşuşar.

Gyzykly bolup bilerЕЩЕ ОТ АВТОРА