“Brutalist” hem-de “Emiliýa Peres” “Altyn globusyň” ýeňijileri

Kino sungatynyň abraýly sylaglarynyň hatarynda görkezilýän “Altyn globus” baýraklarynyň ýeňijileri belli boldy. Hollywood-daky daşary ýurtly žurnalistler guramasy (HFPA) tarapyndan gowşurylýan baýraklaryň 82-nji dabarasyny komediýaçy zenan Nikki Gleýzer alyp bardy. Dabarada iň köp baýraga “Emiliýa Peres” filmi bilen “Sýogun” serialy mynasyp görüldi.

Hemişekliler ýaly, Kaliforniýadaky “Beverly Hills” myhmanhanasynda geçirilen dabarada iň gowy drama filmi diýlip, “Brutalist” kinosy saýlandy. 2-nji Jahan urşundan soň ABŞ-a gelen bosgunyň başdan geçirenleri barada söhbet açýan filmiň baş keşbini janlandyran oskarly Adrian Broudi drama görnüşde iň gowy aktýor baýragyna mynasyp boldy. Filmi surata düşüren Bredi Korbet iň gowy režissýor baýragy bilen sylaglandy.

Dabaranyň iň köp baýrakly kinosy “Emiliýa Peres” iň gowy mýuzikal ýa-da komediýa filmi diýlip saýlandy. Fransiýaly režissýor Žak Odiaryň surata düşüren kinosy iňlis dilinde bolmadyk iň gowy film baýragyna-da laýyk görüldi. Filmiň artistlerinden Zou Saldanýa ikinji plandaky iň gowy aktrisa ugry boýunça Altyn globus baýragynyň ýeňijisi boldy. Şeýle-de, mýuzikal görnüşli bu filmdäki “El Mal” atly aýdym iň gowy aýdym diýlip saýlandy.

Drama filmleriniň iň gowy aktrisasy baýragyna “Men entegem bu ýerde” filminiň ýyldyzy Fernanda Torres laýyk görüldi. Braziliýaly aktrisa sahna çykyp, heýkeljigi alan mahaly baýragy häzirki wagtda 95 ýaşynda bolan we 25 ýyl ozal “Merkezi duralga” filmindäki keşbi üçin “Altyn globusa” dalaşgär görkezilen ejesi Fernanda Montenegro bagyş edýändigini aýtdy. Fernanda Torres Hollywood-yň oskarly meşhur aktrisalarynda – Keýt Winslet, Nikol Kidman, Anjelina Joli, Tilda Swinton dagydan öňe saýlanmagy başardy.

Mýuzikal ýa-da komediýa filmleriniň iň gowy aktýory baýragyna “Başga adam” filmindäki keşbi üçin Sebastian Stan mynasyp görüldi. Ol “Şägirt” kinosyndaky keşbi üçinem drama filmleri boýunça iň gowy aktýor baýragyna-da dalaşgär görkezilip, heýkeljigi mýuzikal ýa-da komediýa ugry boýunça almagy başardy. Mýuzikal ýa-da komediýa filmleriniň iň gowy aktrisasy diýlip “Substansiýa kinosyndaky keşbi üçin Demi Mur saýlandy. Esasy dalaşgärler – Sintia Eriwo hem-de Maýki Medisondan öňe saýlanan 62 ýaşyndaky Mur ýeňşe garaşmandygyny we mundan öň baýrak gazanmandygyny belläp geçdi.

Ikinji plandaky iň gowy aktýor baýragyna-da Kiran Kalkin (“Hakyky jepa”) laýyk görüldi. “Konklaw” filminiň edebi esasyny ýazan Piter Strohan iň gowy ssenariý baýragy bilen sylaglandy.

Iň gowy animasiýa baýragyna latwiýaly režissýor Gints Zilbadolisiň surata düşüren hiç hili dialogy bolmadyk “Akym” multfilmi laýyk görüldi. Bu animasiýa “Garjaşyk 2”, “Ýabany robot” ýaly esasy faworit ekran eserlerini yzda galdyrdy.

Seriallaryň arasynda bolsa iň gowy drama serialy diýlip, “Hulu”-nyň önümi bolan “Sýogun” saýlandy. Serialda baş keşbi janlandyran artistler – Hiroýuki Sanada iň gowy aktýor, Anna Sawai iň gowy aktrisa ugurlary boýunça “Altyn globusyň” heýkeljiklerini gazandylar. Şeýle-de Tadanobu Asano ikinji plandaky iň gowy aktýor baýragy bilen sylaglandy.

Iň gowy mýuzikal ýa-da komediýa serial ugry boýunça Hilegärler atly ekran eseri heýkeljige laýyk görüldi. Aslynda geçen ýylyň ýeňijisi “Aýy” serialynyň bu ýyl hem almagyna garaşýanlaryň sany az däldi. Hilegärler serialynda baş keşpleriniň birini ýerine ýetirýän Jin Smart iň gowy aktrisa baýragy bilen sylaglandy. “Aýy” serialynyň dabarada gazanan ýeke-täk baýragy Jeremi Allen Waýtyň iň gowy aktýor saýlanmagy boldy.

Gysga göwrümli serial ýa-da telefilm ugry boýunça “Sugun çagasy” atly ekran eseri “Altyn globus” baýragyna mynasyp görüldi. Serialyň artistlerinden Jessika Ganninge ikinji plandaky gowy aktrisa baýragynyň gowşuryldy. Geçen ýylyň şowly çykan ekran eserlerinden “Pingwin” serialynyň ýyldyzy Kolin Farrell iň gowy gysga göwrümli serial ýa-da telefilm aktýory ugry boýunça ýeňiji diýlip yglan edildi. “Hakyky detektiw” serialynyň ýyldyzy Jodi Foster iň gowy gysga göwrümli serial ýa-da telefilm aktrisa diýlen ugurda ýeňiji boldy. Ol karýerasy boýunça 5-nji gezek “Altyn globus” baýragyny gazandy.

Dabaranyň dowamynda 2 ussat artist hormat baýraklary bilen sylaglandy. Meşhur aktrisa Wiola Dewis kino sungatynda bitiren işleri üçin Sesil B. DeMill, şol sanda aktýor Ted Danson bolsa teleýaýlym dünýäsine goşan goşandy üçin Karol Börnett adyndaky baýraga laýyk görüldi.

82-nji “Altyn globus” baýraklarynyň ýeňijileri:

Iň gowy film (drama): “Brutalist” (The Brutalist)

Iň gowy film (mýuzikal ýa-da komediýa): “Emiliýa Peres” (Emilia Perez)

Iň gowy aktýor (drama): Adrian Broudi – “Brutalist” (The Brutalist)

Iň gowy aktrisa (drama): Fernanda Torres – “Men henizem bu ýerde” (Ainda Estou Aqui)

Iň gowy aktýor (mýuzikal ýa-da komediýa): Sebastian Stan – “Başga adam” (A Different Man)

Iň gowy aktrisa (mýuzikal ýa-da komediýa): Demi Mur – “Substansiýa” (The Substance)

Ikinji plandaky iň gowy aktýor: Kiran Kalkin – “Hakyky jepa” (A Real Pain)

Ikinji plandaky iň gowy aktrisa: Zou Saldanýa – “Emiliýa Peres” (Emilia Perez)

Iň gowy režissýor: Bredi Kobert – “Brutalist” (The Brutalist)

Iň gowy ssenariýa: “Konklaw” (Conclave) – Piter Strohan

Iňlis dilinde bolmadyk iň gowy film: “Emiliýa Peres” (Emilia Perez)- Fransiýa

Iň gowy animasiýa: “Akym” (Straume)

Iň gowy saz: “Bäsdeşler” (Challengers) – Trent Reznor, Attikus Ross

Iň gowy aýdym: “El Mal” – Klemen Dukol, Kamille, Žak Odiar – “Emiliýa Peres” (Emilia Perez)

Iň gowy serial (drama): “Sýogun” (Shogun)

Iň gowy serial (mýuzikal ýa-da komediýa): “Hilegärler” (Hacks)

Iň gowy gysga göwrümli serial ýa-da telefilm: “Sugun çagasy” (Baby Reinder)

Iň gowy aktýor (drama): Hiroýuki Sanada – “Sýogun” (Shogun)

Iň gowy aktrisa (drama): Anna Sawai – “Sýogun” (Shogun)

Iň gowy aktýor (mýuzikal ýa-da komediýa): Jeremi Allen Waýt – Aýy” (The Bear)

Iň gowy aktrisa (mýuzikal ýa-da komediýa): Jin Smart - “Hilegärler” (Hacks)

Iň gowy aktýor (gysga göwrümli serial ýa-da telefilm): Kolin Farrell – “Pingwin” (The Penguin)

Iň gowy aktrisa (gysga göwrümli serial ýa-da telefilm): Jodi Foster – “Hakyky detektiw” (True Detective: Night Country

Ikinji plandaky iň gowy aktýor: Tadanobu Asano – “Sýogun” (Shogun)

Ikinji plandaky iň gowy aktrisa: Jessika Ganning – “Sugun çagasy” (Baby Reinder)

Teleýaýlymda iň gowy stend-ap komediýa gepleşigi: Ali Wong – “Ali Wong: Single Lady”