Türkmenistanyň futbol çempionatynda 21-nji tapgyrda oýnalan 4 duşuşykda 15 gol geçirildi. Sanawyň öňdebaryjysy “Altyn asyr” myhmançylykda “Nebitçini” 2-1 hasabynda ýeňlişe sezewar etdi. 1-nji ýarymy golsuz geçen oýnuň 56-njy minutynda Altymyrat Annadurdyýew tapawutlanyp, şu möwsümdäki 23-nji pökgüsini derwezä girizdi. 72-nji minutda Umytjan Astanow hasaby deňledi. Duşuşygyň soňky minutlarynda bolsa, Şamämmet Hydyrow “Altyn asyra” ýeňiş getiren goly geçirdi. Oýnuň 60-njy minutynda “Nebitçiniň” oýunçysy Muhammet Annaýew gyzyl kart alyp, meýdançadan çykaryldy. 

Edil şeýle hasap bilen tamamlanan başga bir oýunda 2-nji ýerdäki “Ahal” myhmançylykda “Aşgabatdan” 2-1 üstün çykdy. Gollaryň 3-si hem 2-nji ýarymda geçirilip, “Ahalyň” adyndan 58-nji minutda Guwanç Abylow bilen 67-nji minutda Pirmyrat Sultanow tapawutlandy. Ýer eýeleriniň ýeke-täk goluny 77-nji minutda Nazar Towakelow derwezä girizdi.

Beýleki 2 duşuşykda-da ýeňiş gazanan toparlar 4 golly ýeňiş gazandylar. Mary welaýatynyň wekilleri bu tapgyrda uly hasap bilen asgyn geldiler. “Merw” topary myhmançylykda Köpetdagdan 4-1 utuldy. 8-nji minutda Toýly Goçnazarowyň goly bilen öňe saýlanan “Merwiň” derwezesinden paýtagtlylara ýeňiş getiren gollary Elýas Akyýew (17), Meýlis Diniýew (50), Serdar Baýramow (57 p) hem-de Yhlas Saparmämmedow (75) geçirdi. Energetik hem öz meýdançasynda “Şagadamdan” 4-0 ýeňildi. Kenarýaka şäheriniň topary “Şagadamyň” gollaryny Hemra Amanmämmedow (16), Yhlas Magtymow (26), Ýewgeniý Tkaçenko (41) hem-de Musa Nurnazarow (62) derwezä girizdi.

Çempionatda 22-nji tapgyryň duşuşyklary (“Energetik”–“Köpetdag”, “Aşgabat”–“Şagadam”, “Nebitçi”–“Ahal”, “Merw”–“Altyn Asyr”) şu gün oýnalar.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА