FIFA Klublar arasy Dünýä Kubogynda finala çykan toparlar belli boldy. Finalda UEFA-nyň wekili, iňlis kluby Çelsi bilen KONMEBOL-yň wekili, brazil topary Palmeiras duşuşar. BAE-niň paýtagty Abu Dabide geçirilen ýaryşyň ýarym finalynda Palmeiras topary Afrikanyň wekili, Müsüriň Al Ahli toparyny 2-0 hasabynda ýeňdi. Libertadores kubogynyň çempionyna ýeňiş getiren gollary Weiga (39) bilen Dudu (49) geçirdi.

UEFA Çempionlar Ligasynyň çempiony Çelsi bolsa ýarym finalda Aziýanyň wekili, Saud Arabystanynyň Al Hilal toparyny ýeňdi. Kynlyk bilen 1-0 hasabynda ýeňen Çelsiniň ýeňiş goluny 32-nji minutda Romelu Lukaku öz adyna ýazdyrdy.

Bu ýaryşda Çelsi 2-nji gezek, Palmeiras 1-nji gezek finalda çykyş eder. Çelsi ilkinji finalynda 2012-nji ýylda başga bir brazil kluby Korintiansdan 1-0 asgyn gelipdi. Çelsi bilen Palmeirasyň arasyndaky final duşuşygy 12-nji fewralda, şenbe güni Abu Dabidäki Mohammed bin Zaýediň adyny göterýän stadionda oýnalar. Duşuşyk Aşgabat wagty bilen 21:30-da başlar.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА