PDF
Britan futbolynyň ägirtlerinden, Çempionlar Ligasynyň çempiony, “Altyn topuň” eýesi Denis Low (Denis Law) 85 ýaşynyň içinde doglan şäherinde aradan çykdy. Şotlandiýaly futbolçy 1940-nji ýylyň 24-nji fewralynda Aberdin şäherinde dünýä inipdi.
Ol 1956-njy ýylda “Haddersfil Tawn” klubunda futbola başlap, bu klubda 4 möwsüm çykyş edýär. Soňra 1960-njy ýylda britan futbolynyň rekordyny goýup, 55 müň funt sterlinge “Mançester Sitiniň” düzümine goşulyp, bu ýerde 1,5 möwsüm oýnaýar. 1961/62 möwsümi Italiýanyň “Torino” klubunda geçiren Lowy italýan topary 110 müň sterlinge satyn alýar. Bu görkeziji britan futbolçylaryň arasynda rekorda deň bolýar. 1962-nji ýylda özüne uly şöhrat gazandyrjak “Mançester Ýunaýtediň” düzümine geçýär. Ol bu klubda 11 möwsüm çykyş edýär. “Ýunaýtedlileriň” düzüminde 2 gezek çempionlyk gazanýar. 1967/68 möwsüminde-de şol wagtky Ýewropa Çempion Klublaryň kubogy ýaryşynda (häzirki Çempionlar Ligasy) ýeňiji bolýar. 1 gezek FA Kubogyny, 2 gezegem Angliýanyň Super Kubogyny eýeleýär. Merkezi hüjümçiniň ornunda oýnan Low “Ýunaýtedde” 404 oýunda 237 gezek tapawutlanýar. Ol klubuň iň köp gol salan 3-nji futbolçysydyr. Low 1973/74 möwsüminde “Mançester Sitä” dolanýar we bu onuň futboldaky iň soňky möwsümi bolýar.
Ol klub futbolynda umumylykda her 2 oýnuň birinde diýen ýaly gol geçirýär. Ýagny 602 duşuşykda 303 goly derwezä girizýär. Şotlandiýanyň milli ýygyndysynda-da 55 duşuşykda 30 pökgi geçirýär.
“Altyn topy” gazanan ýeke-täk şotland futbolçy
1964-nji ýylda “Ballon d’Or”-y (“Altyn top”) gazanyp, muny başaran ýeke-täk şotland oýunçysy bolan Low 1968/69 möwsüminde Ýewropa Çempion Klublaryň kubogy ýaryşynyň iň köp gol salan futbolçysy bolýar.
“The King” lakamly Denis Low, Bobbi Çarlton hem-de Jorj Best üçüsine “United Trinity” diýilýär we olaryň bilelikdäki heýkelleri häzirki wagtda “Old Trafford”-yň daşynda durandyr.
