PDF
Angliýanyň FA Kubogy ýaryşynyň 4-nji tapgyrynda käbir duşuşyklarda garaşylmadyk netijeler hasaba alyndy. Bu kubogy 8 gezek eýelän “Liwerpul” myhmançylykda 2-nji ligada iň aşaky orunda barýan “Plimut Argaýl” toparyndan 1-0 hasabynda asgyn gelip, ýaryş bilen hoşlaşdy. Ýer eýeleriniň ýeke-täk goluny 53-nji minutda penaltiden Raýan Hardi geçirdi. FA Kubogynyň taryhynda 4-nji gezek “Premier Liganyň” lideri bolan klub aşaky ligalaryň wekillerinden ýeňildi.
Kubogy 8 gezek gazanan başga bir topar üçinem, “Çelsi” üçinem ýaryş ir tamamlandy. Myhmançylykda “Braýtondan” 2-1 hasabynda utulan “Çelsi” 4-nji tapgyrdan yzyna gaýtdy. Londonlylar duşuşykda 5-nji minutda Werbruggeniň awtogoly bilen öňe geçse-de, Rütter (12) we Mitomanyň (57) gollaryna çäre tapyp bilmedi
Tapgyryň iň esasy duşuşygynda “Aston Willa” öz meýdançasynda “Tottenhamy” 2-1 hasabynda ýeňlişe sezewar etdi. Duşuşykda “Aston Willanyň” gollaryny Remzi (1) bilen Rojers (64), “Tottenhamyň” goluny-da Matys Tel (90+1) geçirdi.
3-nji ligada çykyş edýän “Birmingem” bilen “Nýukaslyň” arasyndaky oýun çekeleşikli geçip, myhmanlar kynlyk bilenem 3-2 hasabynda ýeňiş gazandy (Willok 21, 82, Wilson 26 – Laird 1, Iwata 40).
3-nji ligada çykyş edýän “Leýton Orient” bilen “Mançester Sitiniň” arasyndaky oýunda-da myhmanlara ýeňiş gazanmak ýeňil düşmedi. 16-njy minutda derwezeçi Orteganyň awtogoly bilen öňe geçen ýer eýelerine myhmanlardan täze transfer Husanowyň (56) hem-de De Bruýneniň (79) gollaryny saklamak başartmady.
Kubogyň häzirki eýesi “Mançester Ýunaýted” hem kynlyk bilen ýeňiş gazandy. Öz meýdançasynda “Lester Sitini” kabul eden mankunianlar 90-njy minutdan soň ýeňşini baýram etdi. Myhmanlar De Kordowa-Reidiň goly bilen öňe geçse, 68-nji minutda Zirkzee hasaby deňledi. Oýnuň 90+3-nji minutynda-da Maguaýr “Ýunaýtede” ýeňiş getiren oýunçy boldy.
FA Kubogynda 1/16 finalyň duşuşyklary:
Mançester Ýunaýted – Lester Siti: 2-1, Lids Ýunaýted – Milwoll: 0-2, Leýton Orient – Mançester Siti: 1-2, Kowentri Siti – Ipswiç Tawn: 1-4, Ewerton – Bornmut: 0-2, Preston Nort End – Wikom Wonderers: 0-0 (4-2 p), Southempton – Börnli: 0-1, Stok Siti – Kardiff Siti: 3-3 (2-4 p), Wigan – Fulham: 1-2, Birmingem – Nýukasl: 2-3, Braýton – Çelsi: 2-1, Bläkbörn – Wulwerhempton: 0-2, Plimut Argaýl – Liwerpul: 1-0, Aston Willa – Tottenham: 2-1, Donkaster Rowers – Kristal Palas (şu gije), Ekseter Siti – Nottingam Forest (ertir gije)
