Marokkonuň Patyşasy Muhammed VI ýurduň taryhynda ilkinji gezek zenan maşgala – Fatima Zahra Mansurini Hökümet başlygy wezipesine belledi. Parlament saýlawlaryndan bir hepde soň kabul edilen bu taryhy karar ýurduň syýasy durmuşynda möhüm waka öwrüldi. Konstitusiýa laýyklykda täze Ministrler Kabinetini döretmek tabşyrylan Mansuri Hökümet düzmek üçin beýleki syýasy güýçler bilen gepleşik geçirip, koalisiýa döretmeli bolar.

Onyň ýolbaşçylyk edýän «Hakykylyk we döwrebaplyk» partiýasy 23-nji sentýabrda geçirilen parlament saýlawlarynda 395 orunlyk Deputatlar palatasynda 97 orun alyp, birinji orny eýeledi. Saýlawlarda ikinji orny 66 mandat bilen «Garaşsyzlaryň milli birleşigi» eýeledi, şeýle hem «Istiklal» 65, «Adalat we ösüş partiýasy» 54 we «Halk hereketi» 29 mandat aldy. Şeýle-de bolsa, bu saýlawlarda saýlawçylaryň gatnaşygy 38 göterime deň bolup, bu soňky ýigrimi ýyla golaý döwürdäki iň pes görkeziji boldy.

Täze hökümet Baştutanynyň öňünde ýaşlaryň iş üpjünçiligini ýokarlandyrmak, durmuş üpjünçiligini has-da gowulandyrmak hem-de döwlet tarapyndan alnyp barylýan syýasata ilatyň gatnaşygyny we ynamyny giňeltmek ýaly möhüm wezipeler durýar. Şu nukdaýnazardan, täze hökümet ýurduň durmuş-ykdysady ösüşini has-da güýçlendirmek ugrunda giň gerimli işleri amala aşyrmaly bolar.

1976-njy ýylda Marrakeşde dünýä inen we hünäri boýunça hukukçy bolan Fatima Zahra Mansuri syýasata 2008-nji ýylda «Hakykylyk we döwrebaplyk» partiýasy döredilenden soň geldi. Ol 2009-njy ýylda Marrakeş şäheriniň şäher geňeşiniň başlygy wezipesine saýlanan ilkinji zenan bolmagy başardy, 2021-nji ýyldaky saýlawlardan soň bu wezipesine gaýtadan saýlandy we şol bir wagtyň özünde Deputatlar palatasynyň deputaty boldy. Şeýle hem, ol 2021-nji ýylyň oktýabrynda Aziz Ahanuşyň hökümetine sebit meýilleşdirişi, şäher gurluşygy we ýaşaýyş jaý syýasaty ministri hökmünde girip, 2024-nji ýylyň fewralynda öz partiýasynyň köpçülikleýin ýolbaşçylyk ulgamynyň utgaşdyryjysy wezipesine bellenildi.

Gyzykly bolup bilerЕЩЕ ОТ АВТОРА