PDF
UEFA Çempionlar Ligasynda PSŽ bilen “Bawariýanyň” arasyndaky ýarym finalyň 1-nji duşuşygy ýatdan çykmajak nusgawy oýunlaryň hataryna adyny ýazdyrdy. 9 golly futbol baýramçylygy soňky ýyllaryň iň çekeleşikli, dartgynly we aldym-berdimli geçen duşuşyklarynyň biri hökmünde taryha girdi.
Şweýsariýaly Sandro Şereriň eminlik eden duşuşygy “Bawariýadan” Harri Keýniň 17-nji minutda 11 metrlik jerime urgusyndan geçiren goly bilen başlady. Ýöne ýer eýeleri bu gola tiz jogap berdi. 24-nji minutda Hwiça Kwarasheliýa hasaby deňlese, 33-nji minutda burçdan urguda Žoao Neweş kellesi bilen topy derwezä girizip, parižlileri öňe geçirdi. Ýöne 41-nji minutda möwsümiň ýyldyzlaryndan Maýkl Olise batly urgy bilen topy tora girizip, hasaby deňledi. Yzygiderli garşylykly hüjümler sebäpli režissýoryň gaýtalap görkezmekde kynçylyk çeken duşuşygynda 45+5-nji minutda emin 2-nji gezek jerime meýdançasynyň içindäki ak nokady görkezdi. Bu gezek ýer eýeleriniň peýdasyna bellenen bu 11 metrlik jerime urgusyny Usman Dembele dürs urdy we PSŽ täzeden öňe saýlandy.
Fransuz kluby duşuşygyň 2-nji ýarymyna-da gol hatda gollar bilen başlady. 56-njy minutda Kwarasheliýa asist etmeginde topy batly urup derwezä girizdi. Bu goldan 2 minut soň bu gezek Desire Due asist edip, Usman Dembele hem Kwarasheliýa ýaly özüniň 2-nji goluny geçirdi. 5-2 hasabynda öňe saýlanyp, azda-kände arkaýynlaşyp başlan PSŽ toparyny myhmanlar 3 minudyň içinde aljyraňňy ýagdaýa saldy. 65-nji minutda Ýozua Kimmihiň ýerine ýetiren jerime urgusyny Daýo Upamekano kellesi bilen derwezä girizip, asiste öwürdi we aratapawudy 2 gola düşürdi. Bu goldan 3 minut soňam Keýniň uzak aralykdan beren topuny owadan emel bilen saklan Luis Diaz münhenlileriň 4-nji goluny geçirdi. Bu gollardan soňam PSŽ toparynyň oýunçylarynyň bir urgusyny sütünden yzyna gaýtdy. Şunlukda, duşuşyk 5-4 hasabynda PSŽ-niň ýeňşi bilen tamamlandy. Bu diýmek jogap oýnunda-da janköýerlere has gyzykly duşuşygyň garaşýandygyny aňladýar.
100-nji ýeňiş
Bu ýeňiş PSŽ-niň Çempionlar Ligasyndaky 100-nji ýeňşi bolup, olar ilkinji ýeňşini hem 1994/95 möwsüminde “Bawariýa” garşy gazanypdy. PSŽ 100 ýeňşe ýeten ilkinji fransuz topary boldy.
Bu Çempionlar Ligasynyň taryhynda 9 gol geçirilen ilkinji ýarym final duşuşygy hökmünde hasaba alyndy. Şol bir wagtyň özünde-de 1-nji ýarymynda 5 gol geçirilen ilkinji ýarym final duşuşygy boldy.
Şu möwsümde 43 gol salan PSŽ ýene-de 3 gol geçirse, “Barselonanyň” 1999/2000 möwsümindäki 45 golluk rekordyny täzelär.
PSŽ-niň kapitany Markinios UÇL-däki 120-nji duşuşygyny geçirip, ol bu ugurda Çempionlar Ligasynda iň köp meýdança çykan 2 braziliýaly futbolçynyň biri boldy. Beýlekisi ençeme ýyl “Real Madridde” oýnan Roberto Karlosdyr.
Jogap duşuşygy 6-njy maýda Münhen şäherindäki “Allianz Arenada” oýnalar.
