PDF
Amerikanyň Birleşen Ştatlarynyň Goranmak ministrligi (Pentagon) «uçýan näbelli jisimler» (UFO) hem-de «näbelli howa hadysalary» bilen baglanyşykly wideoýazgylary, suratlary we şaýatlaryň görkezmelerini öz içine alýan täze resminamalar toplumyny neşir etdi. ABŞ-nyň metbugatynyň habar bermegine görä, bu resminamalar ABŞ-nyň Prezidenti Donald Trampyň görkezmesi bilen gizlin maglumatlary açmak we köpçülige ýetirmek işiniň çäginde mälim edildi. Ministrligiň resmi internet sahypasynda ýerleşdirilen maglumatlarda onlarça wideoşekiller, harby we raýat şahslarynyň şaýat bolan hadysalary, derňew ýazgylary hem-de resmi hasabatlar ýerleşdirilendir.
Aýan edilen resmi maglumatlaryň arasynda, 2019-njy ýylda ABŞ-nyň Ýaragly Güýçleriniň Merkezi serkerdeliginiň (CENTCOM) jogapkärçilik zolagynda — Pars aýlagynyň ýokarysynda harby platformanyň infragyzyl sensory tarapyndan hasaba alnan üç sany nätanyş obýektiň wideoýazgysy bar. Şeýle hem 2022-nji ýyla degişli başga bir wideoşekilde Eýranyň kenar ýakalarynda ýüzüp barýan gämileriň golaýyndan uçup geçen dört sany nätanyş desga hasaba alnandyr. Pentagon tarapyndan bu ugurdaky gizlin resminamalaryň ilkinji toplumy şu ýylyň 8-nji maýynda köpçülige mälim edilipdi.
