Hytaýyň Tibet awtonom raýonynda deňiz derejesinden 4500 metr belentlikde lyžada taýmak üçin sport toplumy guruldy. Awtonom sebitiň paýtagt Lhasadan 120 km uzaklykdaky bu merkez geçen ýylyň awgustynda gurlupdyr. Gyş paslynyň gelmegi bilen işe başlan merkeze syýahatçylar hem baryp başlady. Toplum 3000-den gowrak myhmany kabul edip bilýär. Bilermenler lyža merkeziniň gurulmagynyň netijeli bolandygyny, bu ýere her gyşda myhmanlaryň köp sanlysynyň geljekdigini belleýärler. Merkezde gyşyň gelşine baglylykda, eýýäm oktýabr aýyndan başlap, myhmanlary kabul edip bolýar. Merkez aprele çenli açyk bolar. Täze sport merkezi syýahatçylyk pudagyny ösdürmek boýunça welaýat maksatnamasynyň möhüm üstünligine öwrüldi. Awtonom welaýatyň ýolbaşçylary onuň uly geljegi üçin “gar” pudagyny ösdürmekde Tibetiň ähli artykmaçlyklaryndan peýdalanmagy maksat edinýärler. Hytaýyň Syýahatçylyk akademiýasynyň habaryna görä, ýurtda gyş syýahatçylygynyň umumy girdejisi 2025-nji ýyla çenli 1,1 trillion ýuandan geçer.
Mährem BABAMYRADOWA, Hojambaz etrabynyň ýaşaýjysy.
PDF









