PDF
UEFA Çempionlar Ligasynyň täze 71-nji möwsüminde çykyş etjek toparlaryň ählisi pleý-off tapgyrynyň geçirilen jogap oýunlaryndan soň belli boldy. Şu gün agşam bolsa, klublaryň haýsy toparlar bilen duşuşyk geçirjekdigi kesgitlener. Monte Karloda geçiriljek bije çekiliş dabarasy Aşgabat wagty bilen 21:00-da başlanar.
Şeýlelikde, 2-nji gezek liga görnüşinde geçiriljek UEFA Çempionlar Ligasynyň final tapgyrynda çykyş etjek 36 klubuň ählisi hem belli boldy. Şol 36 klub 17 ýurda wekilçilik edip, Angliýadan 6 topar gatnaşar. Ilkinji gezek 1 ýurtdan 6 klubuň gatnaşjak ýaryşyndaky 4 klub Çempionlar Ligasynyň debýutanty bolar. Ýagny Belgiýanyň çempiony “Ýunion Sent-Žilluaz”, Gazagystanyň “Kairat”, Kipriň “Pafos” hem-de Norwegiýanyň “Bude-Glimt” toparlary taryhlarynda ilkinji gezek UEFA Çempionlar Ligasynyň final tapgyrynda çykyş ederler. Olar Çempionlar Ligasynda çykyş etjek 155-156-157-158-nji klublar bolarlar. Geçen möwsümde 5 klub bu ýaryşyň debýutanty bolupdy.
Şeýle-de, Londondan 3, Lissabon bilen Madridden hem 2 klub ýaryşa gatnaşar. Geçen möwsüm gatnaşan 36 klubuň deň ýarysy, ýagny 18-si bu möwsümde gatnaşmaz. Olaryň ornuna başga 18 klub wekilçilik eder.
Çempionlar Ligasynyň 71-nji möwsüminde her klub edil geçen möwsümdäki ýaly 8 duşuşyk geçirer. 8 duşuşygyň netijesinde iň köp utuk toplan 8 klub gönümel 1/8 finala çyksa, 9-24-nji orunlardaky klublar özara pleý-off duşuşyklaryny geçirerler. Liga tapgyrynyň duşuşyklar 16-njy sentýabrda başlap, geljek ýylyň 28-nji ýanwarynda tamamlanar.
Çempionlar Ligasynyň taryhynda şu möwsümde iň gündogarda hem-de iň demirgazykda ilkinji duşuşyklar geçiriler.
Çempionlar Ligasynyň finaly geljek ýylyň 30-njy maýynda Wengriýanyň paýtagty Budapeşt şäherinde oýnalar.
1-nji torba Pari Sen Žermen (Fransiýa) Real Madrid (Ispaniýa) Mançester Siti (Angliýa) Bawariýa (Germaniýa) Liwerpul (Angliýa) Inter (Italiýa) Çelsi (Angliýa) Borussiýa Dortmund (Germaniýa) Barselona (Ispaniýa) 2-nji torba Arsenal (Angliýa) Baýer (Germaniýa) Atletiko Madrid (Ispaniýa) Benfika (Portugaliýa) Atalanta (Italiýa) Wilýarreal (Ispaniýa) Ýuwentus (Italiýa) Aýntraht (Germaniýa) Klub Brýugge (Belgiýa) 3-nji torba Tottenham (Angliýa) PSW (Niderlandlar) Aýaks (Niderlandlar) Napoli (Italiýa) Sporting (Portugaliýa) Olimpiakos (Gresiýa) Slawiýa Praga (Çehiýa) Bude-Glimt (Norwegiýa) Marsel (Fransiýa) 4-nji torba Kopengagen (Daniýa) Monako (Fransiýa) Galatasaraý (Türkiýe) Ýunion Sent-Žilluaz (Belgiýa) Garabag (Azerbaýjan) Atletik Bilbao (Ispaniýa) Nýukasl (Angliýa) Pafos (Kipr) Kairat (Gazagystan)
