PDF
(Günbatar Afrika ertekisi)
Bir wagtlar Ananse atly bir möýjagaz ýaşapdyr. Ol iýmegi örän halaýan eken, ýöne işlemegi halamaz eken. Şol sebäpli hem ol semiz we gysga aýakly eken.
Günlerde bir gün Ananse towşanyňka myhmançylyga barypdyr. Barsa, towşan nahar bişirip oturan eken. Ananse:
– Towşan dost, näme bişirýärsiň? – diýip soraýar.
Towşan bolsa:
– Çorba bişirýärin – diýip, jogap berýär.
Ananse burnuny bürüşdirip:
– Ysy erbet däl eken – diýýär.
Towşan oňa mähir bilen:
– Bir sagat töweregi garaşsaň, taýýar bolar. Isleseň, bileje iýeris – diýip, teklip edýär.
Emma hilegär Ananse: «Häzir munuň ýanynda otursam, maňa kömek et diýip, bir iş buýrar» diýen gorky bilen:
– Dostum, meniň wagtym gaty az, ýöne gowy bir pikirim bar – diýipdir-de, özünden uzyn bir kerep çykarypdyr. – Şu kerebiň bir ujuny gazanyň gapagyna, beýleki ujuny bolsa meniň aýagyma daňaly. Çorba taýýar bolanda sen ýüpi çekersiň, menem şonda gelerin – diýipdir.
Şeýlelikde, Ananse ýola düşüpdir. Köp wagt geçmänkä, ol maýmynyňka barypdyr.
– Salam, maýmyn dost! Näme bişirýärsiň? – diýip soraýar.
Maýmyn:
– Köke bişirýärin. Bir sagada taýýar bolar, otursaň bileje iýeris – diýip, jogap berýär.
Ananse bolsa: «Maýmynyň çagalarynyň galmagaly meni bimaza eder» diýip pikir edip, ýene bahana tapypdyr:
– Men biraz işli, ýöne gowy bir pikirim bar – diýip, ýene bir kerep çykaryp, bir ujuny ojagyň aýagyna, beýlekisini ikinji aýagyna daňypdyr-da, maýmyn bilen hoşlaşyp ýola düşüpdir.
Ananse ýolugra ýene-de birnäçe dostunyňka barypdyr we hemmesine-de şol bir tilsimi ulanypdyr. Ahyrsoňy, sekiz aýagynyň her birine aýry-aýry kerep daňlan Ananse güneşli ýere geçip, ýatypdyr. Ýaňy uka giden mahaly, aýaklarynyň birindäki kerep çekilip başlapdyr. Ananse: «Towşanyň çorbasy taýýar bolan bolmaly» diýip, şol tarapa ýönelmekçi bolupdyr welin, beýleki aýagyndaky ýüp hem çekilipdir. Az salymdan soňra bolsa, ähli aýagyndaky kerepler her tarapa dartylmaga başlapdyr. Her haýsy bir tarapa dartylansoň, Ananse ýerinden hem gymyldap bilmändir.
Kerepler şeýle bir güýçli dartylypdyr welin, ahyrynda olar üzülip gidipdir. Şol dartyşma netijesinde Ananseniň gysgajyk aýaklary süýnüp, inçejik bolup galypdyr.
Şondan soňra Ananse ýaltalygyň ýaramaz endikdigine düşünipdir.
