Ýylyň iň köp pul gazanan futbolçylary, Ronaldo Messiden öňe geçdi

Belli ykdysady neşir bolan “Forbes” žurnaly täze möwsümde iň köp pul gazanjak futbolçylaryň sanawyny mälim etdi. Sanawa görä super ýyldyzlar – portugaliýaly Kristiano Ronaldo argentinaly Lionel Messiden öňe saýlanar. Ýuwentusdan Mançester Ýunaýtede geçen Ronaldo 125 million dollar bilen birinji basgançagy eýeleýär. Ol bu gazanjyň 70 millionyny aýlykdan, galanyny-da mahabat we beýleki girdejilerden alar. Ronaldodan 15 million dollar az gazanjak, geçen ýylky sanawyň birinjisi Lionel Messi 110 million dollar bilen 2-nji orna düşdi. PSŽ-li futbolçynyň umumy gazanjynyň 75 milliony aýlyk haklaryndan bolsa, galan 35 milliony beýleki girdeji çeşmelerinden bolar. Hemişe üçünji orny eýeleýän braziliýaly Neýmaryň ady bu gezek hem üýtgemedi. PSŽ-li futbolçy 95 million dollar (75+20) bilen sanawda 3-nji orny eýeledi. PSŽ-niň başga super ýyldyzy Kilian Mbappeniň 43 million dollar bilen 4-nji bolan sanawynda Liwerpulyň müsürli ýyldyzy Mohamed Salah 41 million dollarlyk gazanjy bilen 5-nji orunda. Polşaly Robert Lewandowski (Bawariýa) bilen ispaniýaly Andres Iniesta (Wissel Kobe) 35 million dollarlyk girdeji bilen 6-7-nji orunlary paýlaşýarlar. Olardan 1 milliony az fransiýaly Pol Pogba 8-nji bolup sanawa goşuldy. Real Madridiň ýyldyzlary uelsli Garet Beýl hem-de belgiýaly Edin Hazar degişlilikde, 32 we 29 million dollarlyk gazançlary bilen ilkinji onlugy jemleýärler.