1-nji ýarymda 4 gol geçiren ilkinji futbolçy

Angliýanyň çempionaty “Premier Ligada” “Çelsi” öz meýdançasynda “Braýton” bilen duşuşdy. Çekeleşikli geçen oýunda myhmanlar hasaby açsalaram, soňlugy bilen olara ýaş oýunçy Koul Palmeri duruzmak olara başartmady. Duşuşygyň 7-nji minutynda Rutter Braýtony öňe çykardy. Şondan soň Palmeriň gollary başlady. Ol 21-nji minutda, penaltiden 28-nji minutda hem-de 31-nji minutda tapawutlanyp, 10 minutda het-trik etdi. 34-nji minutda Baleba “Braýtony” umytlandyrsa-da, 41-nji minutda Jeýdon Sançonyň pasynda Palmer 4-nji pökgini myhmanlaryň derwezesinden geçirdi. Duşuşygyň 2-nji ýarymynda “Çelsi” aratapawudy hasam artdyryp bilerdi. Ýöne esasanam, Jekson we ýoldaşlaryna tapawutlanmak başartmady. Netijede, 4-2 hasabynda ýeňiş gazanan “Çelsi” boldy. Duşuşykda 4 gezek tapawutlanan Koul Palmer Angliýanyň “Premier Ligasynyň” taryhynda 1-nji ýarymda 4 gol geçiren ilkinji futbolçy hökmünde hasaba alyndy. Duşuşykda 4-nji goluň pasyny beren Sanço ”Çelsiniň” düzüminde yzly-yzyna 3-nji duşuşygynda asist etmegi başardy.