Mundan 5 ýyl ozal, futbolyň özboluşly şahsyýeti, meşhur tälimçi Žoze Mourinio, geljekde kimiň has ökde tälimçi boljakdygy bilen baglanyşykly sowal berilýär. Ol bolsa şol wagtlar “Real Sosiedadyň” “B” toparyny türgenleşdirýän Habi Alonsonyň adyny agzap: Kakasy tälimçidi. Futbolçy kakanyň ogly. Tälimçi kakanyň ogly bolup, kemala geldi. edil meniň ýaly, ýöne futbolçylygy meniň futbolçylygyndan güýçlidi elbetde. Futbolçylyk ýyllarynda uly klublarda çykyş etdi. Ispaniýadyr Angliýada, Germaniýada oýnady. Hemem şu tälimçiler bilen işleşdi. “Bawariýada” Guardiola bilen, “Realda” meň bilen, Ançelotti bilen, “Liwerpulda” bolsa Benites bilen. Şol sebäpli olaryň ählisinden özünde geregini bir ýere jemläp bilse, Habi Alonsy güýçli tälimçi bolar – diýip, jogap berýär.
Portugaliýaly tälimçiniň aýdan şol sözleri şu günki günde hakykat ýüzünde-de amala aşdy. 2022-nji ýylyň 5-nji oktýabrynda aşaky orunlarda barýan “Baýere” tälimçi bellenen Alonsonyň entek “A” toparda tälimçilik tejribesi ýokdy. Ýöne ol 119 ýyllyk klubuň taryhyna adyny altyn harplar bilen ýazdyrmagy başardy. Durmuşy diňe futbola bagyşlanan maşgalada dünýä inmegiň hem-de ussat tälimçilerden tälim almagyň netijesi bu günki gün düýşden hem öte.
1981-nji ýylyň 25-nji noýabrynda Ispaniýanyň Tolosa şäherinde dünýä inen Habi Alonsonyň kakasy Periko Alonso Ispaniýanyň belli futbolçylaryndandy. “Real Sosiedad” we “Barselonada” çykyş eden Periko Alonso 2 klub bilen “La Ligada” çempionlyklar gazanýar. Ispaniýanyň milli ýygyndysynda-da 20 duşuşyk geçirip, 1982-nji ýylda Dünýä Kubogyna hem gatnaşýar. Futboly taşlanyndan soň “Eibar” hem-de “Real Sosiedad” toparlaryna tälim berýär.
Agasy Mikel Alonso hem futbolçydy. Ol Ispaniýada “Real Sosiedad” hem-de “Tenerife”, Angliýada-da “Bolton” we Çarlton” klublarynda oýnaýar. Beýleki dogany Jon hem futbolyň içinde bolup, ol emin bolmagy saýlaýar. Mahlasy Habi Alonsonyň ganynda futbol bolup, onuň ökde oýunçy bolmagy üçin ähli şertler bardy. Onuň çagalyk dosty-da belli futbolçylaryň biri bolup, ol häzirki wagtda “Arsenala” tälim berýän Mikel Artetadyr. Olaryň ikisi bir köçede kemala gelýär, bir topuň yzyndan bilelikde ylgaýar. “Antiguoko” toparynyň ýaşlar düzüminde-de bilelikde çykyş edýärler. Alonso “Real Sosiedadyň”, Arteta “Barselonanyň” skautlarynyň ýiti nazaryndan sypmaýar. Ikisiniň ýoly şondan soň ep-esli wagtlyk aýra düşýär. Olar soň-soňlar Angliýanyň Liwerpul şäherinde hersi bir toparda – Alonso “Liwerpulda”, Arteta “Ewertonda” gabatlaşýar.
Futbolçylyk ýyllarynda “Real Sosiedad”, bir möwsümlik “Eibar”, soňra “Liwerpul”, “Real Madrid”, “Bawariýa” toparlarynda oýnap, gazanylmadyk kubok goýmaýar. Meýdançanyň merkezinde oýnan Alonso uzak aralykdan urgulary, takyk paslary, oýny okaýşy we asudalygy bilen meşhurlyk gazanýar. Çempionlar Ligasynda 2, “La Ligada” 1, “Bundesligada” 3 çempionlyk we başga-da birnäçe kuboklar gazanan Alonso Ispaniýanyň milli ýygyndysynda 114 gezek çykyş edip, taryhy başarnyklara eýe bolýar. Ýewropa çempionatynda 2008-nji ýylda, 2012-nji ýylda, Dünýä Kubogynda 2010-njy ýylda gazanylan çempionlyklarda uly rol oýnaýar.
Ussat tälimçileriň elinde kemala gelmek onuň tälimçiligine oňaýly täsir edýär. “Baýer” topary onuň tälimçiliginde tiz hem-de ýokary depginli oýun oýnaýar: top garşydaş toparda mahaly arany ýapýar, gysyş görkezýär, top özlerinde mahaly-da takyk paslar we çalt hereketler bilen öňe okdurylýar. Hüjüme çykan mahaly-da goragy gözden salmaýandygyna, toparyň geçirden gollarynyň az bolmagy muňa doly şaýatlyk edýär. Alonso şol bir oýun taktikasyna iňkisini dikmän, dürli taktikalary synap görýär. Ol bu barada: – Futbolçylarymyň diňe bir ýagdaýda näme etjeklerini bilmekleri ýeterlik bolman, çylşyrymly pursatlarda-da baş alyp çykmany we dürli reaksiýalary bermäge taýýar bolmagyny isleýärin – diýip belleýär.
Meýdançanyň gyrasynda hemişe öz asudalygyny saklamagy başarýan, toparynyň geçirýän gollarynda-da kadaly begenýän, umumylykda pespälli hereket edýän Habi Alonso futbolçylar bilen hiç haçan ýüzbe-ýüz gürleşmekden gaýra durmaýar.
120 ýyla golaýlap barýan taryhynda Lewerkuzen şäheriniň “Baýer” topary ilkinji gezek “Bundesliganyň” çempionlygyny gazanýar. “Bawariýanyň” 11 ýyldan bäri alyp gelýän çempionlyklaryna soňky nokady goýup, üstesine-de, möwsümde oýnan 43 duşuşygynyň hiç birinde hem ýeňilmezden “Bundesliganyň” çempiony bolýar. 2000-nji ýyldan bäri yklymyň öňdebaryjy çempionatlarynda diňe “Ýuwentus” yzly-yzyna 43 duşuşykda ýeňilmändi. Ýewropa Ligasyndaky duşuşykdan soň şol rekordy täzelän “Baýeriň” bu taryhy çempionlygyň gazanylmagynda gürrüňsiz iň uly paý Habi Alonso degişlidir. Ýene bir möwsüm klubda galýandygyny mälim eden Alonsonyň öňünde ýene-de 2 kubok gazanmak mümkinçiligi bar. Germaniýanyň Kubogy ýaryşynda finalda “Kaizerslautern” bilen duşuşjak klub Ýewropa Ligasynda-da ýarym finala çykdy. “Baýerde” 81 oýunda 55 ýeňiş gazanyp, 10 oýunda utulan Habi Alonso ortaça 2,25 utuk gazanýar.
Ýylyň başyndan bäri ady “Liwerpuldyr” “Bawariýa” bilen agzalýan Habi Alonsonyň azyndan bir möwsüm Lewerkuzen şäherinde galyp, 2026-njy ýylyň tomsunda-da “Real Madride” geçmegine garaşylýar.
