Germaniýada dowam edýän 17-nji Ýewropa çempionatynda B toparçada Ispaniýadan soň ikinji bolup, 1/8 finala çykan topar dramatik ýagdaýda belli boldy. Bu ugurda soňky çempion Italiýanyň ýygyndysy bilen Horwatiýanyň ýygyndysy duşuşdy. 1-nji ýarymy golsuz geçen oýnuň 54-nji minutynda emin Danni Makkeli horwatlaryň peýdasyna penalti urgusyny belledi. Ýöne ony ýyldyz oýunçy Luka Modriç dürs urup bilmedi. Onuň urgusyny derwezesi Janluiji Donnarumma saklamagy başardy. Emma şol pursadyň dowamynda täzeden hüjüm eden horwatlar hasaby açdy. Bu goly 30 sekunt oň penalti salyp bilmedik Modriç derwezä girizdi. Ol bu goly geçirmek bilen Ýewropa çempionatynyň taryhynda tapawutlanan iň ýaşuly futbolçy hökmünde hasaba alyndy (38 ýaş 289 gün). Şondan soň Italiýa gysyş görkezse-de, horwatlar erjel goranyp, oýnuň soňlarynda yzygiderli hüjümleri hem gurady. Ýöne eminiň beren goşmaça 8 minutynyň soňky pursatlary olar üçin juda gynançly boldy. Oýna soň goşulan Zakkanýi 90+8-nji minutda owadan urgy bilen hasaby deňledi. Ýeňşe barabar bu deňlikden soň Italiýa 2-nji ýeri eýeläp, 1/8 finala çykmagy başardy. Horwatiýanyň bolsa 2 utuk bilen 3-nji ýeri eýelänleriň arasynda iň gowy 4 toparyň arasyna girmek mümkinçiligi bolsa-da, ýagdaýlary beýleki birnäçe duşuşyga bagly.
Italiýanyň ýygyndysy 1/8 finalda Şweýsariýanyň ýygyndysy bilen duşuşar.
Toparçanyň beýleki duşuşygynda-da Ispaniýanyň ýygyndysy Albaniýanyň ýygyndysyny Ferrari Torresiň 13-nji minutdaky ýeke-täk goly bilen 1-0 hasabynda utup, ýeňlişsiz 9 utuk bilen ýaryşy dowam etdirer.
