Germaniýada dowam edýän 17-nji Ýewropa çempionatynda toparçalardaky duşuşyklar tamamlandy. Toparçalarda 81 gol geçirilip (ortaça 2,25 gol), ähli toparlar azyndan 1 utuk gazanmagy başardy. Ähli toparlar gol geçirip, Germaniýa iň köp gol geçiren topar boldy. Ispaniýa ýeke gol hem geçirtmedi.
Netijede, 24 ýygyndynyň 16-sy ýaryşy dowam edip, galan 8-si öýlerine dolanmaly boldy.Horwatiýadyr Serbiýanyň, Çehiýanyň hatda Ukrainanyň ýygyndylary ýaly bu ýaryşa ozal ençeme gezek gatnaşan toparlar ýaryşy dowam etdirip bilmedi. Olaryň ornuna Slowakiýadyr Sloweniýanyň hem-de ilkinji gezek gatnaşýan Gruziýanyň 1/8 finala çykmagy aýratyn bellenmäge mynasypdyr. Aýratynam horwatlaryň gynançly ýagdaýda, soňky minutda geçirden goly esasynda 1/8 finalyň petegini elden gidermegi olaryň janköýerleri üçin uly urgy boldy.
Çempionatda 1/8 finalyň duşuşyklary 2 günlük arakesmeden soň geçirilip başlanar. 29-30-njy iýunda hem-de 1-2-nji iýulda – her gün 2 duşuşyk geçiriler. 1/8 finalda 29-njy iýunda Şweýsariýa – Italiýa (21:00), Germaniýa – Daniýa (00:00), 30-njy iýunda Angliýa – Slowakiýa (21:00), Ispaniýa – Gruziýa (00:00), 1-nji iýulda Fransiýa – Belgiýa (21:00), Portugaliýa – Sloweniýa (00:00) hem-de 2-nji iýulda Rumyniýa – Niderlandlar (21:00), Awstriýa – Türkiýe (00:00) duşuşyklary geçiriler. Şolaryň arasynda Fransiýa – Belgiýa duşuşygy öňe saýlanyp, iki topar mundan ozal 75 gezek duşuşdylar. Belgiýa 30, Fransiýa 26 gezek ýeňiş gazandy. Şweýsariýa bilenem Italiýanyň ýygyndylary 62-nji gezek özara duşuşarlar. Mundan öňki 61 oýnuň 29-synda italýanlar, 8-sinde şweýsarlar ýeňşini baýram etdi.
1/8 finalda ýeňiş gazanan toparlar 5-6-njy iýuldaky çärýek finalda özara duşuşarlar. Ýarym finalyň oýunlary-da 9-njy we 10-njy iýulda oýnalar. 14-nji iýulda geçiriljek Berlindäki “Olympiastadion”-daky finalda-da 17-nji Ýewropa çempionatynyň iň ulusy belli bolar.
1/8 finalyň duşuşyklary:
29-njy iýun (şenbe)
Şweýsariýa – Italiýa (21:00),
Germaniýa – Daniýa (00:00),
30-njy iýun (ýekşenbe)
Angliýa – Slowakiýa (21:00),
Ispaniýa – Gruziýa (00:00),
1-nji iýul (duşenbe)
Fransiýa – Belgiýa (21:00),
Portugaliýa – Sloweniýa (00:00),
2-nji iýul (sişenbe)
Rumyniýa – Niderlandlar (21:00),
Awstriýa – Türkiýe (00:00).
