UEFA Milletler Ligasynyň täze möwsümine badalga berildi. “A” Liganyň çäginde 1-nji toparçada Portugaliýanyň ýygyndysy öz meýdançasynda Horwatiýanyň ýygyndysy bilen duşuşdy. Çekeleşikli geçen oýunda portugallar 2-1 hasabynda ýeňiş gazandy. Portugaliýanyň ýygyndysyna ýeňiş getiren gollary 4-nji minutda Diogo Dalot hem-de 34-nji minutda Kristiano Ronaldo geçirdi. Horwatiýanyň ýeke-täk goluny bolsa 41-nji minutda Diogo Dalot ýalňyşlyk bilen öz derwezesinden girizdi. Duşuşykda toparynyň 2-nji goluny geçiren 39 ýaşyndaky super ýyldyz Kristiano Ronaldo taryha sepgide ýetdi. Onuň geçiren bu goly super ýyldyzyň karýerasyndaky 900-nji gol hökmünde hasaba alyndy. Ronaldo futbolyň taryhynda resmi duşuşyklarda 900 gol geçiren ilkinji futbolçy diýlip bellenildi. Galyberse-de, bu Ronaldonyň milli topardaky 131-nji goly bolup, ol bu ugurda öz rekordyny ösdürmegini dowam edýär.
Ronaldo duşuşykdan soň ýurdunyň “Sport TV” teleýaýlymyna beren beýanatynda: – Meniň üçin tolgundyryjy pursatlaryň biri boldy. Ýubileý sanlaryň birine ýetdim. Ýeňil görünýän bolmagy mümkin, ýöne beýle däl. Bu yzygiderli, ýadaman, belli bir derejede zähmet çekmegiň, uly taýýarlygyň netijesi. 39,5 ýaşa ýetdim, şu sepgitlere ýetmek üçin has köp ünsümi jemlemeli bolýaryn. Bulam has köp energiýa talap edýär. Şol sebäpli-de şeýle pursatlardan soň tolgunýaryn, edýän işimi gowy görýärin. Elbetde, topardaşlarym, şärikleri bolmadyk bolsa, bu sepgitlere ýetmek mümkin däl – diýip, beýanat berdi.
