Ispaniýanyň çempionatynda 11-nji tapgyryň merkezi oýny Madridde “Real” bilen “Barselonanyň” arasynda oýnaldy. 258-nji resmi “El Klasikoda” ýeňiş katalonlaryň tarapynda boldy. 1-nji ýarymy golsuz geçen oýunda “Barselona” gadym bäsdeşini 4-0 hasabynda derbi-dagyn etdi. Gollary 54-nji we 56-njy minutlarda Robert Lewandowski, 77-nji minutda Ýamal, 84-nji minutda-da Rafinýa geçirdi. Duşuşykda 8 gezek ofsaýta düşen Mbappe 3-4 sany örän amatly pursaty elden giderdi. Onuň geçiren 2 goly-da ofsaýt sebäpli hasaba alynmady. Şunlukda, “Barselona” garşydaşyny 101-nji gezek ýeňlişe sezewar etdi. 42 oýundan bäri ýeňilmän gelýän “Real Madridiň” “La Ligada” ýeňlişsiz seriýasy tamamlanyp, ol şu duşuşykda-da ýeňiş gazanan ýagdaýynda “Barselonanyň” rekordyna şärik bolmalydy. Ýöne Hansi Flikiň tälimçiligindäki “Barselona” rekordyň paýlaşylmagyna rugsat bermedi. “Barselona” topary “Real Madridi” myhmançylykda şu asyrda 7-nji gezek uly hasap bilen utdy. Duşuşykda 3-nji goly geçiren Lamin Ýamal “El Klasikoda” tapawutlanan iň ýaş futbolçy boldy.
Ispaniýanyň çempionathnda “Real Madridden” soň “Atletiko Madrid” hem ýeňlişe sezewar boldy. “Betisden” Himenesiň 4-nji minutdaky awtogoly esasynda asgyn gelen “Atletiko Madrid” şu möwsümde ilkinji gezek ýeňildi. Şunlukda, “La Ligada” Madridiň 2 wekiliniň hem bir tapgyrda utulmagyndan soň ýeňlişsiz topar galmady.
“La Ligada” “Osasuna” hem myhmançylykda “Real Sosiedady” 2-0 hasabynda ýeňlişe sezewar etdi.
La Ligada 11-nji tapgyryň netijeleri:
Espanýol – Sewilýa: 0-2 (Lukebakio 20, 45),
Walýadolid – Wilýarreal: 1-2 (Silla 60 p – Barri 29, Aýose Peres 84),
Raýo Wallekano – Alawes: 1-0 (Siwera 80 ö.d.),
Las Palmas – Žirona: 1-0 (Aleks Munios 42),
Real Madrid – Barselona: 0-4 (Lewandowski 54, 56, Ýamal 77, Rafinýa 84),
Leganes – Selta: 3-0 (Garsiýa 59, Braşanas 78, Gonzales 82),
Hetafe – Walensiýa: 1-1 (Arambarri 90 – Barreneçea 36),
Betis – Atletiko: 1-0 (Himenes 4 ö.d.),
Real Sosiedad – Osasuna: 0-2 (Torro 23, Budimir 34),
Malýorka – Atletik (şu gije)
