Tennis boýunça erkek milli ýygyndylaryň arasyndaky Dewis Kubogy ýaryşynda Italiýa bassyr 2-nji gezek ýeňiji boldy. Ýaryşyň final tapgyry Ispaniýanyň Malaga şäherinde geçirilip, finalda Italiýa bilen Niderlandlaryň ýygyndylary duşuşdy. Italiýa çärýek finalda Argentinany 2:1, ýarym finalda Awstraliýany 2:0 hasaplar bilen ýeňlişe sezewar etdi. Niderlandlar bolsa çärýek finalda Ispaniýadan 2:1, ýarym finalda-da Germaniýadan 2:0 hasaplar bilen üstün çykdy.
Finalda ýekeleýin duşuşyklaryň ikisinde-de italýanlar ýeňiş gazanyp, bu olaryň çempionlygy üçin ýeterlik boldy.. Matteo Berrettini niderland Botik wan de Zandshulpy 6:4 we 6:2 hasaplar bilen utdy. ATP sanawynyň lideri Ýannik Sinner bolsa Tallon Grikspory 7:6 we 6:2 hasaplar bilen ýeňlişe sezewar etdi. Umumylykda 2:0 hasabynda ýeňiş gazanan Italiýanyň ýygyndysy bassyr 2-nji, taryhynda-da 3-nji gezek (1976, 2023, 2024) Dewis Kubogyny eýeledi. Italýanlar bu ugurda russiýaly tennisçiler bilen deňleşdi. Olar şu wagta çenli 6 gezegem finalda utulypdylar (1960, 1961, 1977, 1979, 1980, 1998). Italiýa geçen ýylky finalda Awstraliýany ýeňipdi. Niderlandlaryň ýygyndysyna bolsa ilkinji gezekki finalynda çempionlyk miýesser etmedi.
Italiýanyň düzüminde Ýannik Sinner, Matteo Berrettini, Lorenzo Musetti, Simone Bolelli hem-de Andrea Wawassari dagy çykyş etdiler. Şeýlelikde, Italiýanyň erkekler ýygyndysy zenanlar ýygyndysyndan soň bir ýylyň dowam Dewis Kubogyny hem gazanmagy başardy.
