Halkara futbol federasiýalar assosiasiýasynyň “FIFA The Best” baýraklarynyň bu ýylky ýeňijileri belli boldy. Kataryň Lusail şäherinde geçirilen dabarada ýylyň iň ökde oýunçysy diýlip, “Real Madridiň” braziliýaly ýyldyzy Winisius Junior saýlandy. Altyn topary ispaniýaly Rodrä aldyran Winisius Junior bu gezek münberiň iň ýokary basgançagyna çykdy. Ol 48 utuk alyp, ispaniýaly Rodriden (47 utuk) hem-de topardaşy Jud Bellingamdan (37 utuk) köp ses almagy başardy. Winisius FIFA tarapyndan ýylyň oýunçysy saýlanan 6-njy braziliýaly futbolçy bolup, ondan öň Luis Ronaldo (3), Ronaldinio (2), Romario, Riwaldo hem-de Kaka 2009-njy ýyldan ozal FIFA Dünýäde ýylyň futbolçysy baýragyny gazanypdylar.

Ýylyň derwezeçisi argentinaly Emiliano Martines, ýylyň tälimçisi italiýaly Karlo Ançelotti saýlandy.

Zenanlaryň arasynda ýylyň futbolçysy baýragynyň eýesi üýtgemedi. “Barselonanyň” ispaniýaly ýyldyzy Aitana Bonmati bassyr 2-nji gezek bu hormata laýyk görüldi. Zenanlaryň arasynda ýylyň derwezeçisi baýragyna-da amerikaly Alissa Nair mynasyp boldy. Zenan futbolynda ýylyň tälimçisi baýragy geçen möwsümde Çelsi klubuny, maý aýyndan bäri-de ABŞ-nyň milli ýygyndysyny türgenleşdirýän angliýaly Emma Haýza berildi.

Ýylyň iň owadan goluna berilýän Puşkaş baýragyna “Mançester Ýunaýtediň” argentinaly ýyldyzy Alehandro Garnaço laýyk görlüp, ol “Ewerton” toparynyň derwezesinden üstaşar gol geçiripdi.

Erkekleriň arasynda ýylyň simwolik ýygyndysyna-da Martines – Karwahal, Rüdiger, Diaş, Saliba – Bellingam, Kroos, Rodri – Ýamal, Holann hem-de Winisius Jr saýlandy.

Gyzykly bolup bilerЕЩЕ ОТ АВТОРА