Angliýanyň çempionatynda däp bolup gelýän “Boxing Day” güni 18-nji tapgyryň käbir duşuşyklarynda garaşylmadyk netijeler hasaba alyndy. Şolaryň birinde London derbisinde 2-nji orunda barýan “Çelsi” öz meýdançasynda “Fulhamy kabul etdi. Çekeleşikli geçen oýunda myhmanlar soňky minutlarda 2 gol geçirip, ýeňşini baýram etdi. “Çelsi” Koul Palmeriň 26-njy minutdaky goly bilen 1-0 öňe geçdi. Bu Palmeriň 2024-nji ýyldaky 26-njy goly bolup, ol klubuň rekordyny täzeledi. Mundan öňki rekord Jimmi Floýd Hasselbaýnka degişli bolup, ol 2001-nji ýylda 25 gol salypdy. Ýöne Palmeriň bu rekordy ýeňşe ýetmedi. Oýnuň 2-nji ýarymynda meýdança giren futbolçylar “Fulhama” ýeňiş getirdi. 82-nji minutda Harri Wilson hasaby deňlese, 90+5-nji minutda Rodrigo Muniz “Fulhama” London derbisinde 3 utuk gazandyran goly geçirdi. Şunlukda, “Çelsi” çempionatda soňky 10 oýunda ilkinji gezek ýeňlişe sezewar boldy. “Çelsi” häzirlikçe 35 utuk bilen 2-nji orunda barýar. Şu gün “Arsenalyň” ony geçmek mümkinçiligi bar.

Çempionatda “Bornmut” öz meýdançasynda “Kristal Palas” bilen golsuz deňme-deň oýnady. “West Ham” bolsa myhmançylykda “Southemptondan” Boweniň 59-njy minutdaky ýeke-täk goly bilen 1-0 hasabynda üstün çykdy.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА