Ispaniýanyň Premýer ministri Pedro Sançes tarapyndan ýolbaşçylyk edilýän hökümet ýurtda bikanun ýaşaýan migrantlaryň statusyny kanunylaşdyrmak boýunça adatdan daşary maksatnamany amala aşyryp başlady. Maksatnamanyň ilkinji hepdesiniň dowamynda, 130 müňden gowrak adam resmi taýdan hasaba durmak üçin arza tabşyrdy. Hökümet bu başlangyjy “kölegeli” ykdysadyýete garşy göreşmek we migrantlary jemgyýete uýgunlaşdyrmak üçin möhüm ädim hasaplaýar. Täze düzgüne görä, 2026-njy ýyla çenli Ispaniýada hemişelik ýaşandygyny subut edip bilýän we kazyýet jogapkärçiligine çekilmedik şahslar resmileşdirilmäge hukuk gazanýarlar.
Umumy hasaplamalara görä, bu başlangyç ýurtda resminamasyz gezip ýören 500 müňe golaý adamy öz içine alyp biler. Arza bermek işleri şu ýylyň iýun aýynyň ahyryna çenli dowam eder we oňa onlaýn ýa-da şahsy tertipde gatnaşyp bolar. Emma işiň ilkinji günlerinde administratiw kynçylyklar, nobatlaryň döremegi we hasaba alyş ulgamyndaky bökdençlikler ýüze çykdy. Şeýle hem ýerli häkimiýetler tarapyndan bu çäräniň saglygy goraýyş we durmuş hyzmatlaryna goşmaça agram saljakdygy barada aladalar bildirilýär. Muňa garamazdan, resmi Madrid bu çäräniň müňlerçe işçiniň zähmet hukuklaryny goramaga we olaryň döwlet gaznasyna ätiýaçlandyryş töleglerini tölemegine mümkinçilik berjekdigini nygtaýar.

Gyzykly bolup bilerЕЩЕ ОТ АВТОРА