PDF
Ýewropa Bileleşiginiň daşary syýasat edarasynyň ýolbaşçysy Kaýa Kallas halkara parahatçylyk gepleşiklerinde we dünýäde durnuklylygy üpjün etmekde zenanlaryň ornunyň has-da güýçlendirilmelidigini mälim etdi. Estoniýanyň paýtagty Tallin şäherinde guralan metbugat maslahatynda çykyş etmek bilen, ol häzirki wagtda dünýäniň dürli sebitlerindäki gapma-garşylyklary kadalaşdyrmak boýunça geçirilýän gepleşiklerde taraplaryň wekilçilik düzüminde gender deňliginiň saklanmagynyň möhümdigine ünsi çekdi. Bellenilişi ýaly, halkara guramalaryň, şol sanda Birleşen Milletler Guramasynyň Howpsuzlyk Geňeşiniň geçiren seljermeleri hem zenan wekilleriniň parahatçylyk parahatçylykly başlangyçlara goşýan goşandynyň netijeliligini we durnuklylygyny tassyklaýar. Ýewropa Bileleşiginiň resmisi tarapyndan dünýä diplomatiýasynda diňe gysga möhletli ylalaşyklar bilen çäklenmän, gapma-garşylyklaryň düýpli sebäplerini aradan galdyrmaga gönükdirilen çäreleriň durmuşa geçirilmelidigi aýratyn bellenildi.
Häzirki wagtda Ýewropanyň ugurlary boýunça hem geljekde guralmagy mümkin bolan parahatçylyk gepleşiklerinde wekilçilik meseleleri işjeň maslahatlaşylýar. Hususan-da, halkara parahatçylyk amallarynda we diplomatik gatnaşyklarda deňhukuklylyk ýörelgeleriniň esasy şertleriň biri hökmünde öňe sürülýändigi mälim edildi. Bileleşigiň wekilleriniň habar bermegine görä, Ýewropa döwletleriniň Baştutanlary ýakyn hepdelerde Kipr Respublikasynyň Limasol şäherinde duşuşyk geçirip, halkara durnuklylygy üpjün etmegiň geljekki ugurlaryny we diplomatik şertlerini ara alyp maslahatlaşarlar. Guraljak bu çäreleriň çäklerinde şahsyýetleriň däl-de, eýsem, öňe sürüljek umumy talaplaryň we kadalaşdyryjy esaslaryň mazmunyna esasy ünsüň gönükdiriljekdigi bellenilýär.
