PDF
Hytaý Halk Respublikasynyň Haýnan adasynda köp funksiýaly «Lingnan Agricultural Science Museum» ylmy-gözleg we sergi merkeziniň gurluşygy tamamlandy. Taslamany taýýarlan «Arch Exist» binagärlik studiýasynyň hünärmenleri binanyň daşky görnüşine asmandaky ýumşak buludyň keşbini berip, oňa durnukly ýeňillik we hereketlilik duýgusyny çaýmagy başardylar. Halkara ülňülere laýyklykda, gurlan täze muzeý toplumynyň iň ýokarky gatynda sebitiň ajaýyp gözelliklerine panorama görnüşinde seredýän açyk asmandaky suw howzy ýerleşdirildi.
Milli binagärlik sungatynyň döwrebap çözgütleri esasynda gurlan binanyň içki otaglary ylmy sergileri, halkara maslahatlary hem-de dürli bilim maksatnamalaryny geçirmäge doly niýetlenendir. Binanyň taslamasynda aýna gurluşlaryna uly orun berilmegi içerik tebigy ýagdaýda Günüň şöhlesiniň köp aralaşmagyny üpjün edýär. Gurluşykda doly ekologiýa taýdan arassa önümler we energiýany tygşytlaýjy öňdebaryjy tehnologiýalar ulanyldy. Ýerli häkimiýet edaralary bu täze ylmy merkeziň sebitdäki syýahatçylaryň hem-de alymlaryň ünsüni çekjek esasy desgalaryň birine öwrüljekdigine uly ynam bildirýärler. Desganyň açylmagy Hytaý Halk Respublikasynyň ylym we aň-bilim düzümini ösdürmekdäki nobatdaky möhüm ädimi boldy.
