Amerikanyň Birleşen Ştatlarynyň Ist-Rezerford şäherindäki «MetLife» stadionynda Ispaniýanyň we Argentinanyň milli ýygyndylarynyň arasynda geçirilen futbol boýunça Dünýä çempionatynyň final duşuşygynyň arakesmesinde taryhda ilkinji gezek giň gerimli aýdym-saz şowy guraldy.
Aýdym-saz maksatnamasynda Dünýä çempionatynyň resmi senasy bolan «Dai Dai» aýdymyny ýerine ýetiren Şakira, şeýle hem Madonna, BTS topary, Jastin Biber we «Coldplay» toparynyň solisti Kris Martin ýaly dünýä belli ýyldyzlar çykyş etdiler. Çärede aýdymçy Jastin Biber özüniň «Everything Hallelujah» diýen kompozisiýasynyň sözlerini üýtgedip, «It’s the world cup hallelujah» diýip ýerine ýetirdi. Maksatnama wenesuelaly dirižýor Gustawo Dudameliň ýolbaşçylygynda Nýu-Ýorkuň filarmonik orkestriniň we Simon Boliwar adyndaky Simfoniki orkestriniň gatnaşmagynda nusgawy saz çykyşlary hem girizildi.


Meýdançada sahna gurluşlaryny gurnamak we aýyrmak üçin duşuşygyň iki ýarymynyň arasyndaky arakesme adaty 15 minutdan ýarym sagada golaý uzaldyldy. Bu şowhunly çäre FIFA tarapyndan «Global Citizen» guramasy bilen bilelikde bütindünýä bilim taslamalaryna serişde toplamak maksady bilen geçirilen haýyr-sahawat kampaniýasynyň bir bölegi boldy. Tomaşaçylardan doly meýdançada geçen bu duşuşyk sport we medeniýet äleminiň ajaýyp sazlaşygyny emele getirdi.

Gyzykly bolup bilerЕЩЕ ОТ АВТОРА