2-nji sentýabrda hormatly Prezidentimiziň ak pata bermegi bilen ähli welaýatlarymyzda güýzlük bugdaý ekişine başlandy. Halkymyzyň asylly däbine görä, hormatly ýaşulular Beýik Biribaryň geljek ýylda ak bugdaýyň bereketli bol hasylyny eçilmegini dileg edip, ekişe ak pata berdiler. Oňat taýýarlanan topraga «Her bir dänäň müň bolsun!» diýen sözleri aýdyp, güýzlük bugdaýyň ilkinji tohumlaryny taşlamak bilen, aksakgallar hem-de olaryň ýaş kömekçileri ekiş geçirmek gezegini mehanizatorlara berdiler. Ekişe azyklyk bugdaýyň «Sähraýy», «Juwan», «Bitarap», «Ýolöten-1», «Ýolöten-3», «Türkmenbaşy-1», «Gyzylşaglawuk-25», «Miras», «Akbaş», «Şanly», «Hasylly», «Watan» ýaly hasylly görnüşleriniň ýokary hilli tohumlary taýýarlanyldy.
Ýurdumyzyň bugdaý meýdany 690 müň gektar ýeri eýelär. Babadaýhanlarymyz 2021-nji ýylda 1 million 400 müň tonna bugdaý, şol sanda Ahal welaýatynda – 400 müň, Mary welaýatynda – 345 müň, Lebap welaýatynda – 310 müň, Daşoguz welaýatynda – 265 müň we Balkan welaýatynda – 80 müň tonna däne ýygnap almagy maksat edinýärler.
Şu möwsümde Türkmenistan boýunça «John Deere», «CLAAS», «Case», «Belarus-80H» we «Belarus-82.1» kysymly ýer sürüji traktorlaryň 2 müň 583-si hem-de hatar aralaryny ýumşadýan traktorlaryň 7 müň 605-si, şeýle hem ekijileriň, enjamlaryň 1 müň 723-si we beýleki serişdeler ulanylar.
Güýzlük bugdaý ekişiniň başlanmagy mynasybetli, Ahal welaýatynyň Ak bugdaý etrabynyň «Gäwers», Balkan welaýatynyň Bereket etrabynyň «Türkmenistan», Daşoguz welaýatynyň Gubadag etrabynyň «Türkmenistan», Lebap welaýatynyň Çärjew etrabynyň «Watan», Mary welaýatynyň Wekilbazar etrabynyň «Türkmenistan» daýhan birleşiklerinde welaýat we etrap häkimlikleriniň wekilleriniň, daýhan birleşikleriniň ýolbaşçylarynyň, agronomlaryň, mehanizatorlaryň, gallaçy kärendeçileriň, hormatly ýaşulularyň gatnaşmagynda tejribe maslahatlary geçirildi. Okuw maslahatlarynda ekiş möwsümini guramaçylykly geçirmek, ak ekine ideg etmekde agrotehnikanyň usullaryny we öňdebaryjy tejribäni ulanmaga degişli meseleler ara alnyp maslahatlaşyldy. Munuň özi ekerançylara strategik taýdan möhüm oba hojalyk ekininiň ekişini has amatly möhletde hem-de ýokary hilli geçirmäge kömek eder.
Şeýle hem ýurdumyzyň obasenagat toplumynyň kärhanalarynyň öndürýän önümleriniň hem-de oba hojalyk pudagyna täze gelen tehnikalaryň sergisi guraldy we welaýatlaryň aýdym-saz we folklor toparlary öz konsert maksatnamasy bilen çykyş etdiler.
Söýünmyrat REJEPGELDIÝEW,
S. A. Nyýazow adyndaky Türkmen oba hojalyk uniwersitetiniň talyby.
