Ýewropa futbolynyň öňdebaryjy 5 çempionatynyň biri bolan Angliýanyň “Premier Ligasynyň” täze 29-njy möwsümine, umumylykda 122-nji möwsümine ertir badalga berler.
Futbolyň watany hasaplanýan Angliýanyň “Premier Ligasy” janköýerleriň iň söýgüli çempionaty hökmünde görülýär. 20 toparyň çykyş edýän ligasy adatça awgust aýynda başlaýardy. Ýöne dünýäde emele gelen çylşyrymly ýagdaýlar sebäpli 1 aý töweregi gijigen çempionatyň täze möwsüminiň öňüsyrasynda klublar birnäçe transferleri amala aşyrdy. Geçen möwsüm “Liwerpulyň” 30 ýyldan soň gazanan çempionlygy bilen tamamlanypdy. Täze möwsümde soňky çempion “Liwerpul” bilen bir hatarda “Mançester Ýunaýted” toparlary çempionlygyň iň esasy dalaşgärleri hökmünde görülýär. “Mançester Ýunaýted” bilen Frank Lampardyň tälimçiliginde, birnäçe oýunçy transfer eden “Çelsi” toparlary-da beýleki esasy dalaşgärler hasaplanylýar.
“LIWERPUL”. Lowren, Lallana ýaly oýunçylaryny ugradan “Liwerpul” häzirlikçe esasy düzümini gorap, olaryň hataryna diňe gresiýaly Kostas Simikasy transfer etdi. Ýurgen Klopp 30 ýyldan soň çempionlyk gazanyp, az-owlak arkaýynlaşan topara täzeden güýçli motiwasiýa berip bilse, onda bu möwsümde-de “Liwerpulyň” çempionlyk gazanmagynyň öňünde hiç hili päsgelçilik ýok.
“MANÇESTER SITI”. Geçen möwsümde çempionlygy uly utuk aratapawudy bilen “Liwerpula” aldyran Pep Guardiolanyň tälimçiligindäki “Mançester Siti” yzly-yzyna bu ýalňyşlygy gaýtalamazlyk üçin bar güýjüni aýaman çykyş etse gerek. Topardan Leroý Sane bilen Dawid Silwa giden bolsa, Ferran Torres bilen Natan Ake topara goşuldy.
“MANÇESTER ÝUNAÝTED”. Hataryna “Aýaksdan” Donni wan de Beeki goşan Mançester Ýunaýted ozalky düzümini saklamagy başardy. Norwegiýaly Ole Gunner Suşleriň tälimçiligindäki topara çempionlygyň 3-nji dalaşgäri diýsek ýalňyş bolmaz.
“ÇELSI”. Transfer möwsüminiň iň köp aldym-berdimli kluby “Çelsi” Lampard bilen 2-nji möwsümini geçirer. 2 möwsümlik transfer gadagançylygyndan soň, düzümini ýaş oýunçylar Ziýeş, Werner, Hawerts, Çilwell hem-de tejribeli Tiago Silwa dagy bilen güýçlendiren “Çelsiniň” çempionlyk ugrunda ýiti göreş alyp barmagyna garaşylýar. Toparyň düzüminden Willian, Pedro ýaly oýunçylar başga klublara transfer boldy.
BEÝLEKILER. Şeýle-de Mikel Artetanyň tälimçiliginde FA Kubogy, “FA Community Shield” Kubogyny gazanan Arsenal, Žoze Mourinonyň “Tottenhamy”, geçen möwsümi şowly tamamlan “Lester Siti”, birnäçe ýyldyz oýunçyny transfer eden Karlo Ançelottini tälimçiligindäki “Ewerton”, ussat tälimçi Marselo Bielsanyň ýolbaşçylygyndaky täze topar “Lids Ýunaýted” ýaly klublar bolsa, ilkinji 4-lüge ýa-da öňdäki orunlara ymtylýan beýleki toparlar bolar.
Täze möwsümde klublaryň hemmesi geçen möwsümdäki tälimçileri bilen ýoluny dowam edýär. Çempionatdaky 20 klubuň 8-siniň tälimçisi iňlis, şeýle-de ispandyr portugallaryň hersinden 2, Italiýadan, Demirgazyk Irlandiýadan, Şotlandiýadan, Argentinadan, Germaniýadan, Awstriýadan, Norwegiýadan hem-de Serbiýadan 1 tälimçi toparlara tälim berer.
Çempionatyň täze klublary barada aýdylanda, “Lids Ýunaýted” 16 ýyldan soň, “Championship”-de çempionlyk gazanyp, “Premier Liga” çykmagy başardy. Argentinaly tejribeli tälimçi Marselo Bielsanyň ýolbaşçylygynda “Lids Ýunaýtediň” täze möwsümde öňdäki orunlary eýelemegine garaşylýar. Slawen Biliçiň tälim berýän “West Bromwiç Albion” topary 2, Londonyň wekili “Fulham” bolsa 1 ýyldan soň, “Premier Ligada” çykyş etmäge hukuk gazanypdy.
