Futbol boýunça Türkmenistanyň Milli çempionatynda 22-nji tapgyrda oýnalan 4 duşuşygyň 3-sinde myhmanlar ýeňiş gazandy. Sanawyň lideri “Altyn asyr” myhmançylykda “Merwden” 3-1 üstün çykdy. “Merw” topary beýleki duşuşyklarda bolşy ýaly ilkinji bolup hasaby açmagy başardy. 50-nji minutda Pirmyrat Gazakowyň goly bilen öňe saýlanan “Merw” bu üstünligini saklap bilmedi. 6 minutda 3 gol geçiren “Altyn asyr” nobatdaky 3 utugyny gazanmagy başardy. “Altyn asyra” ýeňiş getiren gollaryň 2-sini Altymyrat Annadurdyýew (63 p, 66), beýlekisini-de Mihail Titow (69) derwezä girizdi.
2-nji orunda barýan “Ahal” myhmançylykda “Nebitçi” bilen duşuşyp, 2-1 hasabynda ýeňiş gazandy. Bu oýunda hem edil “Merw”–“Altyn asyr” duşuşygyndaky ýaly ýer eýeleri ilkinji bolup hasaby açdy. 53-nji minutda Azat Garajaýew “Nebitçini” öňe saýlasa-da, 3 minutda 2 gol geçiren “Ahal topary ýeňşini baýram etdi. Myhmanlaryň gollaryny 65-nji minutda Elman Tagaýew bilen 68-nji minutda Murat Ýakşiýew öz atlaryna ýazdyrdylar. Oýnuň 51-nji minutynda “Ahal” toparynyň ýarymgoragçysy Amir Gurbani 2-nji sary kartyny alyp, meýdançadan çykaryldy.
“Energetik” bilen “Köpetdagyň” arasyndaky oýunda myhmanlar 3-1 hasabynda ýeňiş gazandy. Paýtagtlylara ýeňiş getiren gollary 15-nji minutda Şiri Annaýew bilen 55-nji we 57-nji minutlarda Döwletmyrat Seýitmuhammedow derwezä girizdi. Ýer eýelerinden Begenç Temriýewiň 77-nji minutdaky goly ýeňiş üçin ýeterlik bolmady.
Tapgyryň ýeke-täk ýer eýesiniň ýeňiş gazanan duşuşygynda “Aşgabat” topary “Şagadamy” 1–0 hasabynda utdy. Oýnuň tamamlanmagyna 12 minut galanda toparyň ezber oýunçydy Nazar Towakelow hasaby açýar. Bu duşuşykda ýeke-täk gol bolup, “Aşgabat” topary ýeňiş gazandy.
“Ahal” bilen “Altyn asyr” duşuşar
Ýerli derbileriň tapgyry bolan 23-nji tapgyryň duşuşyklarynyň 2-si şu gün oýnalar (3-nji noýabr). Şu günki oýunlarda “Köpetdag” bilen “Aşgabat”, “Energetik” bilenem “Merw” duşuşar. Ertir çempionlygy kesgitlejek oýunda “Ahal” “Altyn asyry” kabul eder. Şeýle-de Balkan welaýat derbisinde bolsa “Şagadam” “Nebitçi” bilen öz meýdançasynda güýç synanyşar.
